Asanáli Áshimov «Qazaqstannyń Eńbek Eri» ataǵyn ıelendi

Qazaqstan Respýblıkasynyń Prezıdenti Nursultan Nazarbaev KSRO halyq artısi Asanáli Áshimovke  «Qazaqstannyń Eńbek Eri»  ataǵyn berdi dep habarlaıdy Qamshy aqparattyq agenttigi.

         Bıyl KSRO jáne Qazaqstannyń halyq artısi, Memlekettik syılyqtarynyń laýreaty Asanáli Áshimov 80 jasqa toldy. Aıtýly mereıtoı 12 mamyr kúni Áýezov teatrynda respýblıka kóleminde atalyp ótken bolatyn. Alashtyń ardaqtysy Asanáli Áshimov teatr men kıno salasynda qaıtalanbas obrazdar jasap, rejısser retinde de spektaklder sahnalady. Sanaly ǵumyryn óner salasyna arnaǵan sahna sańlaǵy, búginde Áýezov teatrynyń kórkemdik jetekshisi, Qazaqstan Teatrlar Assosıasııasynyń Tóraǵasy qyzmetin atqarady. 

         Ultymyzdyń maqtanyshyna aınalǵan Asanáli Áshimovtiń  mereıtoıy Astana qalasynda ótetin Dúnıejúzilik «Ekspo -2017» kórmesinde de óz jalǵasyn tappaq.