Jylyna 80 áıel kóz jumady

Bul zańǵa Memleket basshysy Qasym-Jomart Toqaev QR keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgertýler men tolyqtyrýlardan bólek, QR Ákimshilik quqyqbuzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgertýler men tolyqtyrýlar engizý týraly 2 zańǵa qol qoıdy.

Jalpy turmystyq zorlyq-zombylyq  boıynsha derekke kelsek, elimizde jylyna 80 áıel kóz jumsa, 150 áıel aýyr jaraqat alsa, 200 áıel orta dárejede, 4000 áıel jeńil jaraqat alady.

Al 111 nómirine kúnine keminde 300 qońyraý túsetin kórinedi.

Sondaı-aq 2023 jyldyń 10 aıynda turmystyq zorlyq-zombylyq máselesi boıynsha 50 myń adam ákimshilik jaýapkershilikke tartylsa, 700 adam qylmystyq jaýapkershilikke tartylǵan. Bul jańa zańnyń qabyldaýyna da sep boldy.

Endi jańa zań áıelder men balalardy qalaı qorǵaıdy? degen suraqqa kelsek, densaýlyqqa ortasha zaqym keltirgender – 2 jylǵa deıin, al aýyr zııan keltirgender – 3 ne 8 jylǵa deıin bas bostandyǵynan aıyrylady. Sýısıdke ıtermelegender 5 jyldan 9 jylǵa deıin bas bostandyǵynan aıyrylsa, balalardy zorlaǵan pedofılder ómir boıy túrmede jazasyn óteıdi. Sonymen birge, otbasyn qoldaý ortalyqtary qurylady.

Osy jerde aıta keterligi, halyq arasynda erteń janjal bolǵan otbasynan balany tartyp almaıdy ma? Tartyp alǵan jaǵdaıda balanyń psıhıkasyna áser etpeıdi me? degen suraqtar týyndady. Bul suraqqa zańgerler 108-bap boıynsha birneshe ret qaıtalanǵan jaǵdaıda ǵana ata-ana quqyǵynan aırylatynyn aıtady.

QR Bala quqyqtary jónindegi ýákil Dınara Zákıeva: «Ár balanyń balalyq shaǵy alańsyz, ári baqytty ótýi tıis. Atalmysh zań bul maqsatty júzege asyrý jolyndaǵy úlken qadam. Zań Memleket basshysynyń 2023 jylǵy qyrkúıektegi joldaýynda belgilengen balalar men áıelderdi qorǵaýdaǵy prınsıpti ústanymynyń arqasynda qabyldandy. Zań jobasyn daıyndaýdy Prezıdent tapsyrmasymen biz memlekettik organdar, Prezıdent ákimshiligimen birlesip, Memlekettik keńesshiniń jeke qoldaýymen, Ulttyq quryltaı, Ulttyq komıssııa músheleri, adam quqyqtary jónindegi ýákil, sarapshylar jáne ÚEU-dyń qatysýymen ótken jyldyń maýsym aıynda bastadyq» deıdi.

Al QR memlekettik keńesshisi Erlan Qarın: «Osy jyldarda turmystyq zorlyq-zombylyqqa qarsy kúreske qatysty sharalar júıesi kezeń-kezeńimen qalyptasty. Búgin qabyldanǵan zań otbasyndaǵy zorlyq-zombylyqqa qarsy is-qımyldy quqyqtyq turǵydan retteý isin qorytyndylady» deıdi telegram paraqshasynda.