«Minber» qoryna – 15 jyl. Almatyda medıafestıval ótti

Is-shara «Data jáne jasandy ıntellekt: Qazaq jýrnalısteri zamanaýı trendterge qanshalyqty daıyn» degen paneldik sessııamen bastalyp, sarapshylar qazaq jýrnalıstıkasyndaǵy máselelerdi, tendensııalardy talqylady.

Munan soń medıatrenerlerdiń sheberlik synyptary ótip, festıval qaıtadan paneldik sessııada jalǵasty.

Is-sharanyń sońyna taman data storılerdiń avtorlary marapattaldy. Bıyl jazda qor Aqtóbe, Qostanaı jáne Pavlodarda data jýrnalıstıka sheberhanasyn ótkizgen. Oǵan óńirdegi jýrnalıster qatysyp, túrli taqyryptarda data storı jazǵan. Solardyń arasynda iriktelip, 11 adam marapattaldy. Yntalandyrý syılyǵyn Móldir Gapız, Rýslan Alkeev jáne Nurgúl Qonaqbaeva (100 myń tg) aldy. Birinshi, ekinshi jáne úshinshi oryndar Aqtóbelik jýrnalıster Araılym Býkenbaevaǵa (1 oryn – 300 myń tg), Raıbek Saǵadatovqa (2 oryn – 200 myń tg), Merýert Qalıevaǵa (3 oryn 150 myń tg) buıyrdy. Bas júldeni (500 myń tg) onkologııalyq aýrýlar týraly data storı jazyp shyqqan qostanaılyq jýrnalıster Zańǵar Sanaı, Balaýsa Júnis, Qaırat Eleýsizov ıelendi. «Eń kreatıvti data storı» nomınasııasy (500 myń tg) boıynsha oraldyq áriptester Azamat Hamza, Dınara Nasyr marapattaldy.

«Minber» qory

«Minber» 2019 jyly bastapqyda qor retinde qurylǵan. Negizin Esengúl Kápqyzy men Ashat Erkimbaı qalaǵan. Qor jýrnalısterdiń, ásirese aımaqtaǵy tilshilerdiń biliktiligin arttyrýdy kózdeıdi.

Jobany alǵash bolyp, Memlekettik tildi damytýdyń prezıdenttik qory qoldaıdy. Uzamaı «Minber» saıty jasalady. Alǵashqy trenıng 2010 jyly mamyrda «Medıa jáne jańa tehnologııa» qoldaýshylary taqyrybynda ótedi. Ony Soros-Qazaqstan qory men Eýropadaǵy qaýipsizdik jáne yńtymaqtastyq uıymynyń Astana bıýrosy qoldaıdy.

Qor júzege asyrǵan eń uzaq joba Qyzylorda qalasynda ónirlik kitaphanashylardyń medıasaýatyn arttyrý boıynsha 2014-2018 jyldary ótken trenıngter. Ony IýNESKO-nyń Almatydaǵy bıýrosy qoldaǵan.

15 jylda túrli serikterter bolsa, olardyń eń turaqtysy – Internews-Kazakhstan. Odan bólek Beeline jáne ERG sekildi bıznes ókilderi de qoldaý tanytqan. Sońǵysyny qoldaýymen qor búginge deıin kóptegen jobalar júzege asyryp keledi.

«Minber» óz tarıhynda 50-den astam trenıng ótkizip, olardy myńǵa tarta túlek oqyǵan. Bireneshe oqý-ádistemelik qural basyp shyǵarǵan.

2018 jyly qordyń janynan «Minber» aqparat agenttigi qurylyp, búginde medıa álimdegi óziniń orny bar aqparat resýrsyna aınalyp úlgerdi. Qor búginde ortalyqqa aınalyp, aqparattyq, aǵartýshylyq, zertteý baǵytynda jumys isteıdi.