M.Áýezov atyndaǵy ádebı birlestik jumysyn qaıta jalǵastyrdy

Keshtiń kirispe sózin Abaı ǵylymı-zertteý ınstıtýtynyń dırektory, fılologııa ǵylymdarynyń doktory, professor Janǵara Dádebaev bastap, qonaqtar men qatysýshy stýdentterdi birlestiktiń tarıhymen tanystyryp, issharanyń sátti ótýine tilek bildirdi. Ádebı-tanymdyq keshtiń qadirli qonaqtary ál-Farabı atyndaǵy Qazaq ulttyq ýnıversıteti fılologııa fakýltetiniń aǵa edvaızeri, aǵa oqytýshy Shoqan Shortanbaev, fılologııa ǵylymdarynyń kandıdaty, aǵa oqytýshy Sovethan Tileýbaev, mehanıka-matematıka fakýltetiniń aǵa edvaızeri, dosent Bolat Ábenov, medısına jáne densaýlyq saqtaý fakýltetiniń aǵa edvaızeri Gúlbaný Árinova kesh barysynda ádebı birlestiktiń aldaǵy shyǵarmashylyq jumysyna aq jol tilep, jyly lebizderin joldap otyrdy. Fılologııa fakýltetiniń 1-kýrs stýdentteri uly Abaı óleńderin jáne óz shyǵarmashylyqtarynan óleń joldaryn jatqa oqyp, «Abaı joly» roman-epopeıasyndaǵy «Qaıtqanda» taraýynan sahnalyq qoıylym kórsetti. Hormen «Kózimniń qarasy» ánin naqyshyna keltire oryndap, Muhtar Áýezovtiń «Áıelder galereıasynan» monolog úzindisin, Abaıdyń ózge tilge aýdarylǵan óleńderin oqydy, mehanıka-matematıka fakýltetiniń stýdentteri «Erke sylqym» kúıin shertti. Keshti Abaı ǵylymı-zertteý ınstıtýtynyń jetekshi ǵylymı qyzmetkeri, professor m.a. Tóregeldi Tuıaqbaı jáne fılologııa ǵylymdarynyń kandıdaty, dosent Láıla Musaly qorytyndy sózben támamdap, qatysýshylarǵa alǵys bildirdi. Atalmysh kesh qos sanatker Abaı Qunanbaıuly men Muhtar Áýezovtiń shyǵarmashylyq murasy men úndestiginen syr shertip, jas býynnyń ádebı-tanymdyq bilimin arttyrdy.

Jumysyn 1941 jyldyń mamyrynda uly qalamgerdiń óz jetekshiligimen bastaǵan ÁDEBI BIRLESTIKTIŃ qaıta jandanýy ádebıetke qumar stýdentterdiń jańa belesterge umtylýyna, shyǵarmashylyq jáne tanymdyq turǵyda damýyna negiz bolmaq. Bul – qazaq ádebıetiniń ǵana emes, ulttyq rýhanııattyń órkendeýine mol úles qosatyn ıgilikti is ekeni daýsyz!

 Ál-Farabı atyndaǵy QazUÝ

fılologııa ǵylymdarynyń

kandıdaty, dosent L. Musaly

Abaı ǵylymı-zertteý ınstıtýtynyń

kishi ǵylymı qyzmetkeri E. Eldos,

fılologııa fakýltetiniń 1-kýrs doktoranty,

JOO-ǵa deıingi daıyndyq kafedrasynyń

aǵa oqytýshysy G.M. Mýjıgova