"Orta eseppen 91 mıllıon teńge": Qazaqstandaǵy ulttyq kompanııa top-menedjerleriniń qansha syıaqy alatyny anyqtaldy

Qazaqstandyq "QazMunaıgaz" ulttyq kompanııasynyń basqarma múshesine orta eseppen jylyna 43 mıllıon teńge jumsalǵan. Al dırektorlar keńesi músheleriniń árqaısysyna beriletin syıaqy mólsheri 10 mıllıonnan asady. Basshylyq quramda bas-aıaǵy 18 adam. Olarǵa bir jylda jalpy somasy 485 mıllıon teńgeden asa qarajat jumsalǵan. Al senat depýtaty Ǵalıasqar Sarybaev top-menedjerlerge jyl saıyn qomaqty syıaqy bergen jón dep esepteıdi. 

“Ulttyq kompanııalar ulttyq jobalardy iske asyrý úshin bolashaqta bizdiń halyqtyń áleýetin kóterý, adamdardyń turmys jaǵdaıyn jaqsartatyn jobalardy ákelýi kerek. Árıne ol salada myqty maman bolý kerek. Bizdiń ekonomıkamyzǵa eki-úsh ese paıda beretin bolsa, ol adam syıaqy alýy kerek. Biraq onyń mólsheri belgili bolý kerek. Al ol adam tek ulttyq kompanııada jumys isteımin, qaǵazdardy ári-beri tasımyn, sondaı jumystarmen otyramyn dese, ondaı adamǵa syıaqy berýdiń qajeti joq”, – dedi depýtat Ǵalıasqar Sarybaev. 

Álemdegi eń iri ýran óndirýshi ónerkásiptiń biri sanalatyn "Qazatomónerkásip" kompanııasy menedjerleriniń syıaqysy orta eseppen 91 mıllıon teńge. Basshylyqta 14 qyzmetker bar.

"Qaztransoıl" kompanııasy da syıaqy boıynsha aldyńǵy qatarda tur. Syıaqy mólsheri 50 mıllıon teńge. Kompanııa 2023 jyly dırektorlar keńesine 151 mıllıon jumsasa, basqarma múshelerine 454 mıllıon teńge aqsha jumsaǵan.

Bir jyldyq jalaqy men syıaqy mólsherin qosqanda jalpy somasy 160 mıllıon teńgege jýyqtaǵan Ulttyq kompanııanyń biri – "Qazposhta" AQ. Basqarma múshesiniń bir jyldyq syıaqy somasy orta eseppen 22 mıllıon teńgege jetken.

Salystyrmaly túrde aıtsaq, eń tómengi syıaqy alǵan kompanııa – "Qazaqstan Temir joly". Mundaǵy basshylar orta eseppen jylyna 4 mıllıon teńge syıaqy alady.