Sarapshylar nelikten Qazaqstanda týý kórsetkishi ekinshi jyl qatarynan tómendegenin túsindirdi

Elimizde alǵash ana atanyp jatqan qyz-kelinshekterdiń jasy ulǵaıyp, týý kórsetkishi kerisinshe, azaıǵan. Máselen, byltyr 379 myń sábı dúnıege kelipti. Bul – keıingi jyldardaǵy eń tómengi kórsetkish. 

Telearna bergen málimet boıynsha, ekonomıkanyń basty tetiginiń biri sanalatyn demografııa máselesi bir ǵana Qazaqstanda emes álem elderi úshin ortaq bolyp otyr. Sonyń ishinde elimizde de pandemııa kezinde bolǵan bebı-býmnan keıin bala týý kórsetkishi aıtarlyqtaı tómendep ketken. Bıyl birinshi toqsanda elimizde 91,9 myń bala dúnıege kelgen. Bul ótken jyldyń sáıkes kezeńimen salystyrǵanda 1,8 paıyzǵa az. Deı turǵanmen, atap aıtar bolsaq, el aımaǵynda týýdyń joǵary kórsetkishi Túrkistan oblysynda tirkelgen. Ekinshi jáne úshinshi oryndarda Almaty qalasy men Almaty oblysy ornalasqan. Al eń az kórsetkishter Ulytaý, Soltústik jáne Shyǵys Qazaqstan oblystarynda tirkelipti. Sarapshylar mundaı máselege negizinen áleýmettik-ekonomıkalyq faktor áser etetinin aıtady. Olardyń pikirinshe, normalar men eńbek naryǵyndaǵy jaǵdaı jastardy otbasyn qurý men balaly bolýdy keıinge qaldyrýǵa májbúrleıdi. Sondyqtan keleshekte atalǵan kórsetkishter tómendeı beredi degen boljam bar. Telearna aqparatynsha, alǵash ret ana atanǵan áıelderdiń ortasha jasy byltyr 25-ten asqan edi. Al bıyl sábıin alǵash qolǵa alǵandar kórsetkishi 29 jasty quraǵan. 

"Jalpy statıstıkadan bólek, áıelderdiń 30 jasta alǵash ret tuńǵysh sábıin qolyna alýy qalypty. Árıne, oǵan qyz-kelinshekterdi kinálaı almaımyz. Álemde bolyp jatqan turaqsyz jaǵdaılardyń báriniń qatysy bar. Buryndary jas ulǵaıǵan saıyn bala týý qıyndaıdy deıtinbiz. Biraq qazir qarqyndy damyǵan medısına onyń da sheshimin taýyp keledi. Ári memleket te otbasylarǵa bala súıý úshin qoldan kelgen kómekti kórsetýge tıis", - dedi UǴA akademıgi Vıacheslav Lokshın.