Toqaev Qazaqstan jemqorlyqqa belshesinen batty deıtinderge jaýap berdi

Memleket basshysy Qasym-Jomart Toqaev elde zań ústemdigin qamtamasyz etý úshin naqty sharalar qabyldanyp jatqanyn aıtty. Sondaı-aq ol sózinde Qazaqstan quqyqtyq memleket ekenin alǵa tartty.

"Qazaqstan – quqyqtyq memleket. Al kez kelgen quqyqtyq memlekette azamattar men ınstıtýttardyń barlyǵy zańdardy, erejeler men normalardy múltiksiz saqtaýǵa tıis. Qoǵamdaǵy qarama-qaıshylyqtar men kelispeýshilikter ulttyq zańnamaǵa jáne negizgi halyqaralyq normalarǵa sáıkes sheshilýi kerek. Bul – men úshin myzǵymas ustanym. Sonda ǵana biz berekeli jáne ádiletti qoǵam quramyz", - dedi ol.

Memleket basshysy zań men tártip qaǵıdatyna barshaǵa birdeı múmkindik beretin ádiletti Qazaqstandy qurý úshin berik irgetas dep qaraýǵa shaqyrdy.

"Biz, eń aldymen, jemqorlyqty túbirimen joıýymyz kerek. Men osy máselege aıryqsha mán beremin. Biz qoǵamda bul keseldiń bar ekenin jasyrmaımyz. Ashyq aıtamyz dep, onyń zardabyn da tartyp jatamyz. Tipti, keıde sheteldikter de, óz azamattarymyz da Qazaqstandy jemqorlyqqa belshesinen batqan el dep oılaıdy. Bul shyndyqqa esh janaspaıdy. El múddesi úshin eńbek etip júrgen adal azamattar az emes. Qaıtalap aıtamyn: jemqorlyq – kesel. Biz tutas qoǵam bolyp oǵan qarsy turýymyz kerek. Sonda ǵana nátıje bolady", - dedi Qasym-Jomart Toqaev.