Dýlat Isabekovtyń Maǵaýınge jaýaby: Men jer satylsyn degen joqpyn

Muhtar Maǵaýın sońǵy suhbattarynyń birinde jer satý máselesi boıynsha Sherhan Murtazany, Farıza Ońǵarsynovany jáne Dýlat Isabekovty aıyptaıdy. Osy jaıly «Kúltóbe» arnasynyń jýrnalısi Berikbol Tólegen jazýshynyń ózinen surap-bildi.

«Bul jer satylmaı qoımaıdy. Biraq meniń aıtqan sózimdi Muhtar Maǵaýın burmalap aıtty. Men «tek Qazaqstannyń azamatyna satylsyn» degenmin. Kelimsekterge berilse bolady. Al sheteldik azamattarǵa múlde jer satylmaýytıis. Olarǵa jalǵa berse, beretin shyǵar.Máselen, qytaılarǵa bersek, ómiri aıyrylmaıdy. Bir jerdi satyp alsa, bárin jumysshy dep alyp keledi. Sóıtip óz jerimizden ózimiz aıyrylyp qalamyz. Jalpy shetelge jer satýdy qoldaǵan joqpyn», - dedi Dýlat Isabekov.

Dýlat Isabekov Maǵaýınniń Sherhan Murtaza men Turar Rysqulov jaıly aıtqan pikirimen, «Rysqulov asharshylyqty qoldan uıymdastyrdy» degen oıymen tolyq kelise almaıtynyn aıtty.

«Sherhan Murtaza jer satylmaı qoımaıtynyn bilgennen keıin qoldasa qoldaǵan shyǵar. Eger Turar Rysqulov asharshylyq jaıly sondaı hat jazǵan bolsa, men de keshire almas edim. Biraq qolyma ondaı hat túsken joq. Muhtardyń qolyna hat tústi me, túspedi me, qaıdam. Múmkin zorlap aıtqyzǵan shyǵar. Al Muhtar Maǵaýın tek jeke bastyń qamyn oılaıtyn adam. Ekeýmiz aıtysyp júrip, sońynda men núktesin qoıǵandaı boldym. Maǵan da aıtpaǵan sózi joq. «Úsh-tórt shyǵarmasyn shettiline aýdartyp, ózinshe máz bop júr» dedi. 28 pesa, 14 prozalyq shyǵarma, 1 roman jazýshy úshin az ba? Pesalarym Anglııanyń tóri Londonnan bastap, álemniń on bir elinde nasıhattalyp jatyr. Kitaptarym men shyǵarmalarym nashar bolsa,  shetelde basylyp shyqpas edi ǵoı. Maǵaýın Amerıkaǵa barǵanda ne istedi? Qazaq ádebıeti men batys ádebıetin salystyryp, maqala jazatyn shyǵar dep edim. Túrkııada qazaq-túrik mádenıeti men ádebıeti jaıly úlken maqala jazatyn shyǵar dep oılap edim. Qazaqstandaǵy azamattarmen aıtysýmen-aq, kúniń ótip jatyr.«Men» degen roman jazdy», - dedi Dýlat Isabekov «Kúltóbe» arnasyna.