«Berilgen ýaqyt az ǵana». Eki balasyn óltirgen áıeldiń sońǵy jazbasy

Túrkistan oblysynda jantúrshigerlik oqıǵa oryn alǵan bolatyn. Shıeli aýdanyndaǵy Pýshkın atyndaǵy №46 mektep-lıseıde tárbıeshi bolyp jumys istep kelgen 31 jastaǵy áıel 6 aqpanda eshkimge eskertpesten úıinen eki balasyn alyp, Túrkistan qalasyna ketip qalǵan.

Sonda páter jaldap, ertesine, 7 aqpanda 2 balasyn jastyqpen tunshyqtyryp óltirgen.

Osy oqıǵanyń aldynda kelinshek óziniń Instagram paraqshasyna balalary men óziniń qolynyń sýretin salyp, «Júrekterimiz máńgi birge» dep jazypty. Oǵan Nurmahan esimdi ánshiniń «Bizge berilgen ýaqyt az ǵana» degen ánin qosqan.

Ánniń mátininde:

«Eshkimge aıta almaı,

Baramyn tunshyǵyp.
Myń túrli synaqtan,
О́te almaı júrmiz kúrsinip.
Taǵdyrǵa bosqa qyrsyǵyp,

Bizge berilgen ýaqyt az ǵana», degen sózder bar.

Kelinshekti jaqsy tanıtyn dostary, synyptastary men synyp jetekshisiniń sózinshe, ol tolyqqandy otbasynan shyqqan, qaıyn jurtynyń turmysy jaqsy, ózi óte aqkóńil, júrgen ortasyn kúldirip júretin ashyq minezdi, qonaqjaı ári balalaryn qatty jaqsy kóretin áıel. Eshqandaı dıspanserlik esepte turmaıdy. Mundaı qylmysqa barady dep eshkim oılamaǵan.

Qazirgi ýaqytta adam óltirý faktisi boıynsha barlyq mán-jaılardy anyqtaý maqsatynda tergeý júrgizilýde.