Aıagóz qasireti sabaq bolsyn

Taǵy da perishteler kókke ushty. Halyqtyń áleýmettik jaǵdaıynyń tómendiginen.  Joqshylyq, jalaqynyń azdyǵy talaı otbasyn tozdyryp jatyr.

Ataýly áleýmettik kómek degen jyry qıyn nárse boldy. Halyqqa ony bermeýdiń myń túrli syltaýyn taýyp qoıǵan. «Bir sıyryń, bes taýyǵyń bar eken, senderge AÁK bersek, jan basyna shaqqandaǵy tabystaryń asyp ketedi» deıdi.

Keshegi Aıagózde gaz jarylyp, 4 balanyń qazasyna da AÁK sebep boldy. Balalardyń ákesi santehnık, anasy jumyssyz. Aýdandyq basshylar sıyryń bar, tabysyń kóp dep, memleketten alatyn AÁK-ti kesip tastapty. Balalaryn asyraımyn degen ana bazarǵa sút satýǵa shyǵyp ketken desedi. Úıine qaıtyp kelgende, aýyr qaıǵyǵa dýshar boldy.

– Ataýly áleýmettik kómektiń adamǵa jetýine korrýpsııa kedergi bop turǵany jasyryn emes. AÁK-ti eki qabatty kottedjde turyp, djıp minip júrgender de alyp jatyr. Sonyń kesirinen shyn muqtaj otbasylarǵa bul kómek tıe bermeıdi. Sebebi, sıyr saýyp, qoldan sút satsa da memorgandardyń kózine «olıgarh» sekildi kórinip, járdemaqyny alyp tastaıdy. AÁK-ti alý úshin taqyr kedeı bolý kerek. Osy «kedeılik shegi, múgedektik dáleli» degen keritartpalyqtardy alyp tastaý kerek. Qaıbir jyly bir aıaǵy joq, múmkindigi shekteýli kisi «Jylda múgedek ekenińdi dáleldeýiń kerek, biraq aıaq qaıta óspeıdi ǵoı» dep jylaǵan. Sol sekildi kedeılikti únemi dáleldeý kerek pe? Tıisti zań qabyldaný úshin, ana balalardyń janynda bolý úshin áli qanshama sábı qurban bolýy kerek, – deıdi jýrnalıst Kámshat Tasbolat.

Qazaqstanda AÁK taǵaıyndalýy úshin otbasy memlekettik organdar shyǵarǵan talaptarǵa sáıkes bolý kerek. Iаǵnı, AÁK otbasynyń árbir múshesine shaqqandaǵy tabysy eń tómengi kúnkóris deńgeıinen 70 paıyz tómen bolǵanda taǵaıyndalady. Kedeılik shegi 35 789 teńge mólsherinde belgilengen. Bul kómek bıyl 107,8 myń otbasyndaǵy 565,7 myń adamǵa ǵana taǵaıyndalǵan.

Qoǵam belsendisi Sáýle Ábildahanqyzy Ataýly áleýmettik kómekti tek kópbalaly otbasylar ne kedeı otbasylar ǵana almaýy kerek, elimizde arnaıy «Ana men bala» kapıtal qory qurylsyn deıdi.

– Aqyry memleketten bólinetin qarjy ǵoı. Másele – ony qalaı berýde. Ádemi, mádenıetti uıymdastyrýǵa bolady ǵoı! Onyń birden bir joly «Ana men bala» kapıtaly» memlekettik qoryn quryp, sol arqyly ár balaǵa jeke shot ashý. Ol shot balaǵa ǵana tıesili shot bolý kerek, – deıdi ol.