Qazaqtyń bir qotyry – Irına Kaıratovna

«Irına Kaıratovna» degen toptyń kezekti konserti ótipti. Konserttiń sońynda sáýkele taǵyp, ulttyq kıimmen sahnada syzylyp turǵan qyzdar kenet sáýkelelerin jerge qoıyp, shashtaryn jalbyratyp, bastaryn shaıqap jyn urǵandaı bıleýge kóshti. Esirgende, osylaı esirdi.

Buǵan deıin bul toptyń bir múshesi elimizdiń kók týyn sahnaǵa ýmajdap alyp shyǵyp, «bireýdiń qymbatty kók týy...», dep sandyraqtap, ony «túkirgenim bar!» degendeı kórermenderge laqtyrmaq bolǵan. О́zi sahnaǵa mas kúıde shyǵyp, bylapyt sóılegen. Sol kezde laıyqty jazaǵa tartylmaǵandyqtan, bul top áli de bilgenderin istep júr. 

– Bulardy, bir sózben aıtqanda, «rýhanı múgedekter» der edim. Semizdikti qoı ǵana kóteredi demekshi, keı adamǵa baq berilse, kótere almaı qalady. «Irına Kaıratovna» da solaı. Buǵan deıin týymyzdy bylǵady. Meıli, sahnada bilgenin istep, keremet bop júre bersin. Biraq qazaqtyń ulttyq qundylyqtaryna tıispesin. Sahnadaǵy álgi qazaq qyzdarynyń namysy qaıda?

Qazaqtyń qorlanbaǵan nesi qaldy? Onsyz da tilimiz qorlanyp bitti, kıimimiz, týymyz taptaldy. Halyqty qashanǵy ashyndyra beredi? Kúnderdiń kúni munyń báriniń bitetin kezi keledi. Bul top halyqtan keshirim suraýy kerek. Negizinde, ulttyq qundylyǵymyzǵa qatysty arnaıy bap, zań bar. Sol boıynsha bulardy jaýapqa tartsa, basqa da ánshisymaqtarǵa sabaq bolar edi, – deıdi Qamshy.kz portalynyń suraǵyna jaýap bergen jýrnalıst, qoǵam belsendisi Jan Ahmadıev.

Akter Bekjan Turystyń sózinshe, qazaqtyń ánderin qaraıtyn kórkemdik keńes joq. Sahnada turyp, shekten shyǵa beretinder kóbeıdi. Keıde solardy toqtatýdyń ornyna, «e, jańylysqan eken», dep qorǵap jatamyz.

Eń ókinishtisi, sondaılardyń ánin tyńdap, tirligine elikteıtinder – jastar. Bul ne ózi, ósip kele jatqan jas urpaqty ádeıi buzý ma?

Baıqasańyz, ulttyq qundylyqtarymyzdy mazaq etkender ne keshirim surap, ary ketse aıyppul tólep qutylatyn jaman úrdis paıda boldy. Qazaq zatymyz bireýlerge mazaq bolatyndaı ne jazdyq?