Astanada elektr jelileri qaıta jańartylady

Keshe «Astana – aımaqtyq elektrjelilik kompanııasy» aksıonerlik qoǵamy nysandaryna baryp, atqarylǵan jumystardy kórdik. Ulttyq ekonomıka mınıstrligi ­Tabıǵı monopolııalardy retteý komıtetiniń Astana qalasy bo­ıynsha departamenti uıymdastyrǵan baspasóz týryna qalalyq máslıhat depýtattary, Qoǵamdyq keńes músheleri, Astana qalasy Kásipkerler palatasynyń ókilderi qatysty.

Aldymen delegasııa músheleri ­L.Mırzoıan 29P mekenjaıyndaǵy «PNF» qosalqy stansasyna bardy. Almaty aýdanyndaǵy birneshe kósheni elektr energııasymen qamtamasyz etetin stansany qaıta qurý jumysy júrgizildi.

– Aksıonerlik qoǵam elordany úzdiksiz elektr energııasymen qamtamasyz etý maqsatynda 2021-2025 jyldarǵa arnalǵan ınvestısııalyq baǵdarlama qabyldady. Onyń sheńberinde elektr jelileri men stansalardy jańartýǵa 23 mıllıard teńge qarastyrdy.

2023 jylǵa 4,5 mıllıard teńge qaralsa, sonyń 1,7 mıllıard teńgesi ıgerildi. «PNF» qosalqy stansasy – sondaı nysannyń biri. Bul obekt 1985 jyldyń basynda iske qosyldy, sońǵy ret qaıta qurý jumysy 2008 jyly júrgizildi. Bul stansaǵa 663 mln teńge qaralyp, oǵan transformatorlar ornatylyp, beınebaqylaý júıesi montajdaldy, órt dabyly ornatyldy, toq ótkizgishi montajdaldy, kirme uıashyqtary aýystyryldy. Nátıjesinde 40 MVA transformatorlary neǵurlym qýatty 63 MVA-ǵa aýystyryldy, – dedi kompanııa basqarma tóraǵasynyń orynbasary Rýslan Abjanov.

Investısııalyq baǵdarlamany iske asyrý arqyly elektr jelileriniń tozýyn jáne apat jaǵdaıyn azaıtý, energııanyń normatıvtik ysyrabyn 10,7 paıyzdan 9,8 paıyzǵa qysqartý kózdelip otyr.

Ekinshi nysan – Táýelsizdik dańǵyly men Kúıshi Dına kóshesiniń qıylysyndaǵy 502-transformatorlyq shaǵyn stansasy. Munda tranformatordyń qosymsha bólshekteri aýystyryldy.

Odan keıin delegasııa Sh.Qudaıberdiuly kóshesindegi «Ortalyq» shaǵyn stansasyna bardy. 1983 jyly qurylǵan stansada jańartý jumysy qarqyndy júrýde.

– Bul stansada TRDN 40000 2-kúsh beretin transformatory aýystyrý talap etildi. T1 qyzmet etý merzimi – 40 jyl, T2 – 49 jyl. Onyń jalpy qýaty – 63 kV. Odan bólek, ákimshilik ǵımarat jóndeledi. Buǵan 908 mln teńge aqsha bólindi. Jóndeý jumysy jyl sońyna deıin aıaqtalady, – dedi Rýslan Abjanov.

Astana qalasyndaǵy elektr energııasy jelisi 33 paıyzynyń tozyǵy jetken. Bıylǵy jańartý jumysynyń nátıjesinde tozyǵy jetken jelini 1 paıyzǵa qysqartady eken. Eger elordanyń ulǵaıyp, jańadan turǵyn úıler salynyp jatqanyn eskeretin bolsaq, bas qalanyń basty máselesi elektr energııasyna degen tapshylyqty sheshý bolady.