"Qorqytý-úrkitý bastaldy": Dýman Muhamedkárim saılaý nátıjesine qarsy "beıbit mıtıngke" shaqyrdy

Adam quqyǵy jónindegi halyqaralyq bıýroda saılaýǵa ózin-ózi usynǵan kandıdattardyń biri Muhtar Taıjan da baspasóz máslıhatyn ótkizip, saılaýdy moıyndamaıtynyn málimdedi, dep jazady Qamshy.kz aqparat agenttigi. Sharaǵa birqatar qoǵam belsendileri qatysty. 

Jýrnalıst Dýman Muhamedkárim jaqtastaryna birneshe ret qoqan-loqy jasalǵanyn aıtty. 

"Saılaýdyń aty shyqqaly jaqtastarymdy qorqytý–úrkitý, satyp alýǵa tyrysý bastaldy. Saılaýdaǵy zańbuzýshylyqty kórgender Ulttyq qaýipsizdikti saqtaıtyn polısııadan qorqady", dep málimdedi Dýman Muhamedkárim.

Baspasóz máslıhatynda jýrnalıst Dýman Muhamedkárim saılaý barysyndaǵy zańsyzdyqtardy kórgen azamattarmen vıdeo arqyly sóılesip, dálelderdi kórsetti. 

"Qandy qańtardan keıin evolıýsııaǵa bet burǵan shyǵarmyz dep úmittengen edim. Biraq osy saılaý da ádiletsiz ótti, daýysymyz urlandy. Qazaqstannyń búkil baılyǵyn 150 olıgarh pen 2 shaldyń qolynda qaldy. Halyq dymsyz qaldy. Toqaev synaǵan "dıvan sarapshylary" ornymyzdan turaıyq. Beıbit sherý jasamasaq, bárimiz túrmede shirımiz. 120 kandıdatty naýryzdan keıingi bir kúndi belgilep, mıtıngke shyǵýǵa shaqyramyn", dep habarlady jýrnalıst. 

Sondaı-aq jýrnalıst óziniń de aldyńǵy qatardan tabylyp, mıtıngke qatysatynyn aıtyp ótti. 

"Tazy ashýyn tyrnadan alady demekshi endi Ujymdyq qaýipsizdik týraly shart uıymyn alyp kelip narazy halyqty qyryp tastaýy ábden múmkin. Biraq men aıtqanymnan qaıtpaımyn. 120 kandıdat, daıyn otyryńyzdar. Bılik  qoıylymǵa aınaldyrǵan saılaý nátıjesin kóreıik.  Hattamalaryn alyp, ózimizdiń nátıjemen salystyraıyq. Bul bılikti evolıýsııa ózgertpeıdi. Sebebi olarda sana joq. Tek qana revolıýsııa... Aldaǵy bir kúndi belgileıik. Eger sol ýaqytqa deıin meni qamap tastamasa, atyp tastamasa ózim aldyńǵy qatarda bolamyn", dep pikir bildirdi Dýman Muhamedkárim.