Tamos Education túlekteri endi AQSh-tyń orta bilim týraly dıplomyn alady

28 mamyr kúni «Tamos Education» mektebi «Swiss Innovators Club» (Shveısarııa) kommersııalyq emes bilim berý assosıasııasymen jáne FEYDEY (Kalıfornııa, AQSh) bilim berý uıymymen strategııalyq seriktestikke otyrǵanyn habarlady.

Jańa halyqaralyq seriktestiktiń arqasynda «Tamos Education» mektebiniń oqýshylary kelesi oqý jylynan bastap Global Secondary Education baǵdarlamasy boıynsha oqýdan ótedi. Bul oqýshylarǵa úzdik bilim berý baǵdarlamalarynyń biri – K-12 baǵdarlamasy boıynsha pánderdi aǵylshyn tilinde oqyp, 11-synypty bitirgende Qazaqstannyń memlekettik attestatymen qatar AQSh dıplomyn da alýǵa biregeı múmkindik beredi.

Álemde úsh alyp bilim berý baǵdarlamasy bar

Tamos Education mektebiniń bas dırektory Baýyrjan Serik: «Álemde úsh alyp baǵdarlama bar. Birinshisi – IB (International Baccalaureate) – halyqaralyq bakalavrıat. Bul – keń taralǵan ataqty baǵdarlama. Biraq ony mektebimizge engizý qıyn bolmaq ári qymbatqa túspek. Ekinshisi – Cambridge A levels baǵdarlamasy. Tamos Cambridge-de osy baǵdarlama boıynsha bilim beriledi. Alaıda ony biz qazaq, orys mektepterine engizýdi jón sanamaımyz. Sebebi bul jaǵdaıda da oqý baǵasy sharyqtaıyn dep tur. Úshinshi tanymal baǵdarlama K-12 dep atalady. Bylaısha aıtqanda, balabaqshadan 11-synypqa deıin qamtylatyn oqý prosesi. Statıstıkaǵa súıensek, K-12 boıynsha oqıtyn oqýshylar sany aldyńǵy eki baǵdarlama qoldanýshylarynan asyp túsedi».

K-12 baǵdarlamasy balalarǵa ne beredi?

«Bizdiń balalarymyz álemniń túkpir-túkpirinen jınalǵan myqtylarmen básekege túsedi. Sondyqtan bizge osyndaı halyqaralyq standartqa shyǵý qajet. Qazir jaı ǵana aǵylshyn tilin bilýmen tańqaldyra almaısyz. Sondyqtan dıplomnan buryn baǵdarlama boıǵa sińiretin qarym-qabilet pen daǵdylar mańyzdyraq. K-12 baǵdarlamasyn sátti aıaqtaǵan oqýshy sheteldik JOO-na oqýǵa túskende foundation kezeńinen (bakalavrıat/magıstratýra/doktorantýraǵa arnalǵan qarqyndy akademııalyq jáne tildik daıyndyq – red.) sekirip ótip birden 1 kýrsqa qabyldana alady. Ol úshin bala 2 kezeńnen turatyn oqý prosesinen súrinbeı ótýi tıis. Birinshi kezeń 1-synypta bastalady. Kele jatqan kúrkúıekten bastap aqyryndap aǵylshyn tilinde pánderdi oqı bastaıdy. Al 9-synyptan bastap «dıplom alý» kezeńine daıyndalady. Biraq bul jańalyq tek 1-synyptarǵa qatysty dep túsinip qalmaý kerek. 10-synypqa deıingi kez-kelgen synyp K-12 baǵdarlamasyna mursat alady. Bizge balanyń qaı synypta oqıtynynan buryn aǵylshyn tili qaı deńgeıde ekeni mańyzdy. Sebebi baǵdarlama ár balamen jeke jumys isteıdi.

Mysaly, bala 3-synyp oqýshysy. Alaıda aǵylshyny álsizdeý, deńgeıi 2- synyptaǵylarmen shamalas. Demek júıe oǵan 2-synyptyń materıaldaryn meńgerýdi usynady. Olardyń emtıhandy sátti tapsyrǵanda ǵana 3-synyp materıaldaryna kirisedi. Osylaısha júıe ár balamen jeke dara jumys istep nátıje shyǵarýdy kózdeıdi. Ol úshin arnaıy platformaǵa kirip, logın/parol engizip, oqýǵa aptasyna 4-5 saǵat arnasa jetkilikti.

Keı ata-analar «Biz sheteldik JOO-ǵa túspeımiz» dep baǵdarlama qundylyǵyn jete túsinbeýi múmkin. Sheteldik oqý ornyna túsýdi maqsat tutpaǵan balaǵa da baǵdarlama báribir qajet. Sebebi búgingi zaman globaldi. Bárimiz úlken bir qaýymdastyqta ómir súremiz. Álemdik ekonomıka qaýymdastyq negizinde jumys isteıdi. Mysaly, belgili bir elder taýar óndirýmen aınalysady. Kelesi elder naryqqa ıdeıalaryn satady. Mundaı qaýymdastyqta basqalarmen ıyq tiresip, jemisti jumys isteý úshin aǵylshynsha oılana bilý mańyzdy. Biz balalarymyzǵa aýmaly-tókpeli bolashaqta Qazaqstanmen shektelmeı, globaldi startaptarda/jobalarda eńbek etýge múmkindik beremiz».

«2», «3» degen baǵa qoıylmaıdy

«Swiss Innovators Club» prezıdenti George Makhviladze: «Men osy baǵdarlamanyń negizin qalaýshysymyn, metodologymyn. K-12 baǵdarlamasy Qazaqstanda 2015 jyldan beri júzege asyrylyp otyr. 2016 jyly biz myńdaǵan pedagogty osy baǵdarlama boıynsha oqyttyq. Sebebi aǵylshyn tilin biletin hımııa pániniń muǵalimi bolsa da ol aǵylshynsha hımııany jaqsy bere alady degen sóz. Sondyqtan aldaǵy úsh jyl «Tamos Education» pedagogtarynyń daıyndyǵyna, oqýshylardyń beıimdelýine arnalady. Bul júıe boıynsha muǵalim «2», «3»  degen baǵa qoıamaıdy. Ondaı baǵa múldem joq. Bala «5» degen baǵa almaıynsha qaıta-qaıta sabaqty tyńdap, emtıhanyn tapsyra beredi. Sóıtip eń jaqsy degen nátıjesi ǵana esepke alynady. Muǵalim balanyń janynda otyryp qadaǵalamaıdy. Onyń maqsaty – tek shabyttandyrý. K-12 boıynsha bala bos ýaqytynda ózi sabaq tyńdaıdy. Qashan júıege kiredi, qansha saǵat otyrady – munyń bárin ózi sheshedi. Demek biz oqý prosesin, taım-menedjmentin ózi uıymdastyra alatyn balany tárbıeleımiz. Al bul – paıdaly daǵdy. Tek qana ata-ana tarapynan balaǵa kámil senim, muǵalim tarapynan qoldaý men motıvasııa bolsa jetkilikti».

Nátıjesinde «Tamos Education» mektebiniń túlekteri orta bilim alǵanyn rastaıtyn qazaqstandyq attestatpen qatar amerıkalyq dıplom alady. Ol úshin 24 kredıtti (pándi – red.) jabýy shart. Bir aıta keterligi, 9 kredıt qazaqstandyq attestattan kóshiriledi.