Túrkııadaǵy Nazarbaevqa tıesili "Rixos" qonaqúıi memleket menshigine ótti

Eks-prezıdent Nursultan Nazarbaev Túrkııanyń Antalıa qalasyndaǵy "Rixos" qonaqúıin QR prezıdenti is basqarmasynyń menshigine ótkizdi, dep habarlady Forbes.kz basylymy. 

Basylym málimetishe, naýryz aıynyń aıaǵynda Úkimet janynan Ekonomıkany monopolııasyzdandyrý jónindegi komıssııa qurylǵannan bastap belgili bir aktıvterdiń memlekettik menshikke, negizinen syıǵa tartý sharty nysanynda aýysqany týraly aqparat anda-sanda jarııalanyp keledi. Úkimet mundaı "syılyqtardy" qabyldaýdy tıisti qaýlymen bekitedi.

Bıyl memleketke qaıtarylǵan múlikter jóninde resmı aqparat jarııalanbady. Mysaly, Nursultan Nazarbaev ta qymbat múlikti qaıtarýǵa májbúr bolǵanyn kóbi bile bermeıdi. Bul – Nursultan Nazarbaevqa tıesili Túrkııanyń Antalıa qalasynda ornalasqan Rixos Beldibi qonaqúıi. Atalǵan múlik Qazaqstanda  "Alataý qonaqúıi" AQ retinde tirkelgen.

2021 jylǵy 31 jeltoqsandaǵy jaǵdaı boıynsha aýdıttelgen qarjylyq esepke sáıkes, qonaqúıdiń 23%-dan sál astamyna Memlekettik múlik jáne jekeshelendirý komıteti, 77%-yna "Jyljymaıtyn múlikti basqarý dıreksııasy" JShS ıelik etken. Sońǵysy jeke "Elbasy qoryna" tıesili. Al qor Nazarbaevtiki. 

Úkimettiń 2022 jylǵy 15 aqpandaǵy №62 qaýlysyna, QBP grıfimen (qyzmettik paıdalaný úshin), sondaı-aq 1 naýryzdaǵy qabyldaý-tapsyrý aktisine sáıkes, ekonomıkany monopolııasyzdandyrý jónindegi komıssııa qurylǵanǵa deıin de memlekettik múlik jáne jekeshelendirý komıteti "Alataý" qonaq úıi" AQ memlekettik aksııalar paketin ıelený jáne paıdalaný quqyǵyn QR Prezıdenti Is Basqarmasyna bergen. 16 aqpanda "Jyljymaıtyn múlikti basqarý dıreksııasy" JShS kompanııa aksıonerleriniń quramynan shyqqqan. Bul rette qonaqúıdiń aýdıttelgen qarjylyq esebinde Qazaqstan eks-prezıdentiniń úlesin aýystyrý ádisine qatysty qosymsha túsiniktemeler joq. Bul satyp alý-satý mámilesi me, álde syılyq sharty ma, belgisiz bolyp qala bermek.

Qazir qonaqúı tolyǵymen QR prezıdenti is basqarmasynyń ıeligine ótti.