Polısııa "Dempartııa" jaqtastaryn mıtıng ótkizbesten ustap alyp ketti, ol kezde alańda konsert ótip jatty

Almatyda polısııa Demokratııalyq partııa bastamashyl tobynyń jetekshisi Janbolat Mamaı men ózge de saıası tutqyndardy bosatýdy talap etip mıtıng uıymdastyrmaq bolǵan belsendilerdi ustap alyp ketti.

Janbolat Mamaıdyń jaqtastary Almatyda zań boıynsha mıtıng ótkizetin oryndardyń biri retinde belgilengen Shoqan Ýálıhanov atyndaǵy alańda beıbit jıynǵa shyǵatynyn málimdep, qala ákimdigine tıisti eskertý joldaǵan. Belsendiler hatyna ákimdikten jaýap kelmegen.

Al búgin alańda Otan qorǵaýshylar kúnine arnalǵan merekelik is-shara ótip jatty.

Foto: Qamshy.kz

Ǵylym akademııasy ǵımaratynyń aldyna sahna qurylyp, kórermender úshin oryndyqtar qoıylǵan. Áskerı kıimdegi oqýshylar, kýrstanttar teatrlandyrylǵan kórinister qoıdy.

Foto: Qamshy.kz

Belsendiler muny alańǵa bettegende ǵana bilgenin, ákimdik alań bos bolmaıdy dep eskertpegenin aıtady.

Belsendiler Qonaev pen Shevchenko kósheleriniń qıylysynda "Janbolatqa bostandyq" dep jazylǵan fýtbolkalaryn kıim, talaptaryn aıta bastaǵanda polısııa olardy birtindep ustap alyp ketti. Ustalǵandar arasynda "Dempartııa" ókilderi Inga Imanbaı, Abzal Dostııarov, Dáýren Dostııarov, Nurbol Baıterekov, jýrnalıst, Oyan, Qazaqstan! qozǵalysynyń belsendisi Ásem Jápisheva men belsendi Janel Shahan bar.

Foto: Manas Qaıyrtaıuly

Qoǵam belsendisi Janbolat Mamaı aqpan aıynan beri qamaýda otyr. Ol aldymen qańtar oqıǵasy qurbandaryna arnalǵan qaraly mıtıngti uıymdastyrǵany úshin 15 táýlikke, artynsha eki qylmystyq is boıynsha eki aıǵa qamaýǵa alynǵan. Oǵan  "qarabet" degeni úshin quqyqqorǵaý organy qyzmetkerin qorlady, nesıe amnıstııasyna baılanysty "jalǵan aqparat" taratty degen aıyp taǵylyp otyr. Atalǵan aıyptarǵa sáıkes, sot kináli dep tapsa, belsendi 3 jylǵa bas bostandyǵynan aıyrylýy múmkin.