"Basyma paket kıgizip tunshyqtyrdy". Tanysynan jábir kórgen Shymkent turǵynynyń janaıqaıy

QR Joǵarǵy sotynyń tóraǵasy Jaqyp Asanovtyń
QR Bas prokýrory Ǵızat Nurdáýletovtyń
QR Ishki ister mınıstri Erlan Turǵymbaevtyń

NAZARYNA

Qamshy redaksııasyna Shymkent qalasynyń Ulan Qılymbek atty turǵyny habarlasyp, ózin bıznestegi seriktesi qorqytyp, almaǵan aqshasyn aldy dep qolhatqa qol qoıdyryp, vıdeoǵa túsirip alǵanyn aıtty. Onyń sózinshe, jergilikti polısııa bólimi jábirlenýshi shaǵymy boıynsha qozǵalǵan isti dálel jetkiliksizdigin jeleý etip sotqa jetkizbeı otyr. Máseleniń mán-jaıy jazylǵan oqyrman haty tómende qaz-qalpynda usynylǵan. Qamshy – erkin aqparat alańy. Eger tómendegi hatta aty-jónderi atalǵan Asylhan Qarsaqbaev pen tergeýshi Rústem Qýanyshbekov oı-pikirin birdirgisi kelse, jarııalaýǵa ázirmiz.

Men, jábirlenýshi Ulan Qılymbek 2017 jyldyń maýsym aıynan Asylhan Qarsaqbaev atty azamattyń Shymkent qalasynda ashqan telefon aksessýarlaryn satatyn «Qazyna» dúkeninde qytaı tilinen aýdarmashy ári satýshy bolyp jumys istep keldim. Arasynda Qytaıdan Qazaqstanǵa taýar ákelip satyp, kásip jasap júrdik.

Birde Asylhan Qarsaqbaevtyń dosynyń quny 12 mln teńgelik jıhazǵa kerekti zattaryn Qytaıdan Qazaqstanǵa jetkizip berdim. Qytaı saýdagerleri úlken somada taýar alǵanym úshin 200 myń teńge kóleminde «shotal» bergen. Sony bilip qoıǵan Asylhan Qarsaqbaev «osy ýaqytqa deıin meniń de taýarlarymnyń ústinen paıda taýyp júrgen shyǵarsyń» dep kúdiktene bastap, «shotal» retinde alǵan 200 myń teńgeni ózine qaıtarýymdy talap etti. 2019 jyldyń 27 jeltoqsanynda Asylhannyń kóligimen 3 jigit meni eki jaǵymnan ustap aǵam Ularbektiń úıine apardy. Men aǵammen jolyǵyp, aqshany alyp, túngi saǵat 2-de 200 myń teńgeni Asylhandarǵa berdim. Ony qasymdaǵy bir jigit kórip turdy. Áńgime osymen bitken shyǵar dep oılaǵanmyn.

Alaıda ertesi Asylhan meni saǵat 9-da taǵy shaqyryp alyp «2017 jyly qazan aıynda Qytaıǵa barǵanda jeti myń dollar aqsham joǵalǵan. Sony sen aldyń» dep negizsiz jala japty. 3 adam bolyp urdy, soqty, basyma paket kıgizip tunshyqtyrdy. Aqyry «3 mln aqsha urladym» dep qolhat jazyp berýimdi májbúrledi.

Qolhatta «Men Qılymbek Ulan Qarsaqbaev Asylhannan 3 mıllıon teńge aqsha aldym, 2020 jylǵy sáýir aıynyń 15-ne deıin «HYUNDAI ELENTRA» avtokóligin ákelip beremin. Kepilge ózimniń minip júrgen «TOYOTA CAMRY» avtokóligimdi, júrgizýshi kýáligimdi, avtokólik qujatyn jáne jeke kýáligimdi, LG telefonymdy, Samsung S8 telefonymdy qaldyryp kettim» delingen. Is júzinde onyń eshqandaı aqshasy urlanbaǵan.

Eshkimniń aqshasyn almaǵandyqtan, kinásiz ekenimdi zań júzinde dáleldep, quqyǵymdy qorǵaǵym kelip, Shymkenttegi Abaı aýdandyq polısııa bólimine aryzdandym. 2019 jyldyń 31 jeltoqsanynda aryzymdy tergeýshi Rústem Qýanyshbekov qabyldady.

2020 jyldyń 2 qańtarynda R.Qýanyshbekov meni Asylhan Qarsaqbaevpen bettestirdi. Qarsaqbaev polısııa bólimshesinde óziniń kinásin tolyq moıyndap, menen keshirim surady. Menen tartyp alǵan múlikti qaıtaryp berýge ýáde berdi.

Jeke kýáligimdi, avtokóligimdi, avtokóliktiń qujattaryn, LG telefonymdy qaıtaryp bergenimen, maǵan buǵan deıin berilgen 300 myń teńge qaryzdyń óteýi retinde kólik júrgizý kýáligimdi jáne S8 telefonymdy ózine alyp qaldy. Alys-berisimiz, ortaq isterimiz bolǵan soń qaryz alǵanym ras. Ony qaıtarýdan qashpaımyn. Tek adam sekildi sóılesse bolady ǵoı. Ol olaı istemek túgili, «qaıda shaǵymdansań, onda shaǵymdan, qolyńnan kelgenin istep al. Polısııamen másele sheshilgen soń aıaǵyńdy shaǵam» dep qoqan-loqy kórsetti. Júrgizýshi kýáligim men telefonymdy ala almadym. Bul azdaı Asylhan meniń telefonymmen áldekimderge hat jazyp, qylmystyq isterge shaqyryp, meni qaralaýǵa tyrysyp júr.

Al tergeýshi R.Qýanyshbekov óz tarapynan tıisti eshteńe istep otyrǵan joq. Sonyń saldarynan Qazaqstan qylmystyq kodeksiniń 179-baby (Qaraqshylyq, ıaǵnı bóten múlikti urlaý maqsatynda shabýyl jasaýǵa ushyraǵan adamnyń ómiri men densaýlyǵyna qaýipti kúsh kórsetýmen nemese tikeleı osyndaı kúsh qoldanamyn dep qorqytýmen ushtasqan shabýyl jasaý) boıynsha 2019 jyldyń 31 jeltoqsanynda qozǵalǵan is áli jyljymaı tur.

R.Qýanyshbekov Qarsaqbaevpen sóz baılasyp alǵan ba, isti sotqa joldamaı otyr. Sózinshe, dálel jetispeıdi eken. 2020 jyldyń 2 qańtarynda kabınetinde bolǵan áńgimeni «umytyp» qalǵan sııaqty. Kabınette Qarsaqbaevtyń kinásin moıyndaǵanyn joqqa shyǵardy. Is barysy boıynsha onymen sóılesý, kezdesý múmkin emes. Qońyraý shalsań, tutqany kótermeıdi. Jolyǵaıyn dep ishki ister bólimine barsań, ishke kirgizbeıdi. Ańdyp túski asqa shyqqan ýaqytynda ustap almasań, kórýiń muń. Meniń tergeýshini aýystyrý týraly jazǵan aryzymnan eshteńe shyqpady.

Osy hat arqyly saǵyzsha sozylyp bara jatqan is sotqa jetip, Asylhan Qarsaqbaevqa tıisti shara qoldanylyp, máselege núkte qoıylsa eken deımin.