06 Aqpan, 2020 Áleýmet
![](/media/2020/02/06/crop-11_5_478x638_maska.jpg?width=600&height=480)
news.ru
Búgin, ıaǵnı 6 qańtarda elorda ýaqytymen 16:00-de densaýlyq saqtaý mınıstrliginiń resmı ókili Dıas Ahmetshárip vedomstvonyń facebook-tegi paraqshasy arqyly málimdeme jasady. Onda koronavırýs ınfeksııasynyń Qazaqstanda taralýynyń aldyn alý sharalary, Qytaıdan elge kelgen azamattardyń jaǵdaıy týraly, medısınalyq betperdeni taǵý kimge mindetti, kimge mindetti emestigi jaıly aıtty.
Qazaqstanda koronavırýstyń taralý jaǵdaıy tirkelmegenin habarlaǵan resmı ókil medısınalyq betperdeni jappaı taǵýdyń qajeti joq ekenin, tek sýyq tııýdiń belgileri bolǵanda ǵana taǵý kerektigin málim etti.
Onyń sózinshe, betperde óndirýshi qazaqstandyq kompanııalar men dıstrıbıýtorlar arnaıy qorlaryn Qytaıǵa satyp jibergen. Sonyń saldarynan el ishinde betperde tapshylyǵy sezilgen. Máseleni sheshý úshin úkimet betperde eksportyna tyıym salǵan.
Almatydaǵy dárihanashylardyń aıtýynsha, qalada medısınalyq betperde áli de tapshy. Kóbinde birneshe kún buryn taýsylyp qalǵan. Qamshy tilshisi tildesken dárihana qyzmetkerleri betperdelerdiń áp-sátte satylyp ketip jatqanyn aıtty.
Esimin atamaýdy ótingen dárihanashy "betperdeler kóbirek jetýi úshin jazda alyp qoıǵan qordy az-azdan satyp otyrmyz" deıdi.
– Bizdiń dárihananyń tusynda mektep bar. Betperdelerdi alatyndardyń kóbi oqýshylar. Bizdegi betperdeler jazdaǵy qordan qalǵan. Olardyń ózi bitýge jaqyn. Oqýshylarǵa meılinshe jetsin degen oımen ár adamǵa shekteýli danadan satyp jatyrmyz, – degen dárihanashy baǵany 30 teńgeden asyrmaǵanyn, alyp-satarlar jıi keletinin aıtty.
– Birneshe myńdap suraıtyndar kóp. Olar bizden arzanǵa alyp, qymbatqa satqysy keledi. Biz ondaı adamdarǵa bermeımiz. Olarǵa satsaq, oqýshylarǵa jetpeı qalady, – dedi dárihanashy.
Sadyhan dúkender jelisiniń Rano esimdi qyzmetkeri "betperde qoımalarda da qalmady" deıdi.
– Buryn betperdelerdi Qaraǵandydan, Almatydan alatynbyz. Tapshylyq sezile bastaǵanda Qytaıdan ákelindi. Betperde qazir ol jaqta da tapshy sııaqty. Keshe bizge Úrimshi qalasynan qońyraý shalyp, 2 mln dana "maska" kerek ekenin aıtty. Túrkııadan 50 myń dana izdep habarlasqan jaǵdaı boldy. Tapsyrys berip qoıdyq. Qashan keletini belgisiz, – dedi ol.
Dárihanashynyń aıtýynsha, koronavırýstan qorǵanýda betperdege qaraǵanda arnaıy medısınalyq beıdj tıimdirek.
– "Maska" jeńil ınfeksııalardan qorǵamasa, koronavırýstan qorǵaı almaıdy. Onyń ústine ony eki saǵattan artyq taǵyp júrýge bolmaıdy. Odanda ınfeksııaǵa qarsy arnaıy beıdj alǵan durys. Olar eki aıǵa deıin taǵýǵa jaramdy. Baǵasy 3000 teńge, – deıdi dárihanashy.
Dári satýshylarǵa bir adamǵa 20 danadan artyq betperde satpaý týraly nusqaý túsipti.
Aıjan esimdi dárihanashynyń sózinshe, úlken kólemde betperde izdep, qońyraý shalyp jatqandarda esep joq.
– Sońǵy birneshe kúnnen beri "maska" saýdasy qyzyp tur. 1 myń danadan, 1 mln danaǵa deıin alamyz dep jatqandar bar. О́zimiz alyp júrgen fırmada uzyn-sonar kezek. Bárine birdeı úlgermeı jatyr. Tapsyrysymyz araǵan kún salyp kelip jatyr, – deıdi dárihanashy.
Qamshy tilshisi baryp kórgen jeti dárihananyń ekeýiniń esiginde "masok net" degen jazý ilýli tur. Tórteýinde betperde shekteýli mólsherde 30-50 teńge aralyǵynda satylyp jatyr. Olardyń arasynda otandyq óndirýshilerdiń úsh qabatty betperdeleri de, qytaılyq óndirýshilerdiń bir qabatty juqa betperdeleri de bar. Báriniń aıtatyny bireý: betperdeni qorap-qorabymen, myńdap satyp alǵysy keletinder kóbeıgen.
Sondaı-aq medısınalyq betperdelerdi ǵalamtor arqyly satý jıilegen. Olx saıtyndaǵy habarlandyrýlardan kóz súrinedi.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir