Qytaıda vırýstan kóz jumǵandar sany artty, vırýs Eýropaǵa da jetti

Qytaıda koronavırýsty juqtyrǵandar men odan kóz jumǵandar sany kúrt ulǵaıdy. Qytaı bıligi 25 qańtarda vırýstan 41 adam kóz jumyp, 29 provınsııada keminde 1 287 adam vırýsty juqtyrǵanyn habarlady. Qytaılyq BAQ-tyń jazýynsha, vırýs juqtyrǵandardyń arasynda  237 naýqastyń jaǵdaıy aýyr.

Sońǵy aqparatqa sáıkes, Hýbeı provınsııasynda - 39 adam, Hebeı provınsııasynda - bir adam, Heılýnszıanda - bir adam kóz jumǵan. 

25 qańtarda belgisiz vırýstyń Avstralııa men Fransııaǵa da jetkeni habarlandy. Biraq  Qytaıdan basqa jerde vırýsty juqtyrǵandar arasynda adam ólimi bolǵan joq.

Fransııa úsh adamnan vırýs tabylǵanyn habarlady. Bul Eýropada tirkelgen alǵashqy jaǵdaı. Resmı tulǵalar eki naýqastyń Parıj aýrýhanasyna jatqyzylǵanyn habarlady. Bireýi eldiń ońtústik-batysyndaǵy Bordo qalasynda emdelip jatyr.

AQSh-ta eki jaǵdaı tirkelgen: biri - eldiń soltústik-batysyndaǵy Sıetl qalasynda, ekinshisi - Chıkago qalasynda. Eki adam da Qytaıǵa saıahattap, jaqynda oralǵan.

Avstralııanyń densaýlyq saqtaý salasy mamandarynyń aıtýynsha, 25 qańtarda Vıktorııa shtatynda 50 jastan asqan Qytaı azamatynan vırýs tabylǵan. Shtattyń densaýlyq saqtaý mınıstri Djennı Mıkakostyń aıtýynsha, naýqas 19 qańtarda Qytaıdyń Gýanchjoý qalasynan ushyp kelgen.

"Alańdaýǵa negiz joq. Pasıent ońasha jerde emdelip jatyr jáne budan basqa jaǵdaı tirkelmedi" dedi ol.

О́tken jyldyń aıaǵynda Qytaıda belgisiz vırýs tarap jatqany aıtyla bastady. Koronovırýs dep atalǵan bul vırýs Qytaıdyń Ýhan jáne Hýangen qalalarynda kóptep taralǵan. Soǵan baılanysty Qytaı bıligi bul eki qalany japty. Ázirge pnevmonııaǵa uqsas dertke shaldyqtyratyn vırýstyń qaıdan shyǵyp jatqany belgisiz. 2002 jyly osyǵan uqsas vırýstan Qytaı men Gonkongte 600-den astam adam ólgen.

23 qańtarda Dúnıejúzilik densaýlyq saqtaý uıymy (DDSU) Qytaıda ınfeksııanyń taralýyna baılanysty densaýlyq saqtaý salasynda tótenshe jaǵdaı jarııalaýdan bas tartty. DDSU-nyń basshysy Tedros Adzhnom Gebreıesýstyń aıtýynsha, mundaı sheshim qabyldaý úshin áli kóp derek jınaqtalýy tıis.