Saılaý qarsańynda "joǵalyp ketken" akter Shrı-Lankadan sálem joldady (vıdeo)

Maýsym aıynda Qazaqstandaǵy prezıdent saılaýy qarsańynda belsendiligimen kózge túsip, keıin is-tússiz joǵalyp ketken akter Ánýar Nurpeıisov 14 qazan kúni You Tube-taǵy jeke arnasyna vıdeo júktedi.  Shaǵyn vıdeoda akter osy ýaqytqa deıin ne sebepti "elden tasada júrgeni" jáne ózine qandaı "qaýip tóngeni" týraly aıtty.

Nurpeıisovtyń aıtýynsha, ol qazir Shrı-Lankadaǵy araldardyń birinen demalys ornyn 3 jylǵa jalǵa alyp, turyp jatyr. Atalmysh vıdeoda ol ózin "bılikke satylyp ketti" degenderge de jaýap berdi.

– Bizdiń adamdarǵa ne bolǵan? Meni bılikke satyldy dep oılaıdy. Olar ár nársege analız jasap, aq pen qarany ajyrata almaıdy. Qaıdaǵy bir ósekke senedi. Al men bolsam qyzmetim men ómirimdi qaýipke tiktim. Negizinde maǵan bastapqyda úndemeýim úshin aqsha usynǵan bolatyn, – dedi akter. 

Nurpeıisov "saıasatqa aralasqany qate bolǵanyn" aıtyp, aldaǵy ýaqytta tek shyǵarmashylyqpen aınalystan  jetkizdi.

– Saıasattyń oıynyna aralassań, shynaıy baqyttan alystaısyń. Endi tek shyǵarmashylyqpen aınalysyp, saıahattaǵym keledi.  Men prezıdent tańdaı almasam da, memleket tańdaı alamyn, – dedi ol.

Akter Nurpeıisov bastaǵan jastardyń uıymdastyrýymen jasalǵan #Menoıandym degen fleshmob Qazaqstandaǵy prezıdent saılaýy kezinde qoǵamda qyzý talqylanyp, kóptegen jastardan qoldaý tapqan bolatyn. Saılaý qarsańynda jarııalanǵan vıdeoda jastar eldegi bılik júıesin synǵa alyp, halyqty "oıanýǵa" shaqyrdy. Akterdiń ózi bılikke qarsy «soǵys» jarııalap, "Qazaqstanda demokratııa joq, elimiz Soltústik Koreıa ustanǵan saıasatqa qaraı baǵyt alyp bara jatyr" dep málimdegen edi. Alaıda saıası belsendiligimen kózge túsip, jastardyń qoldaýyna ıe bolǵan Nurpeıisov saılaýǵa tórt kún qalǵanda – 5 maýsym kúni joǵalyp ketti. Ony izdegen dostary men týystary "saıası belsendiligine baılanysty akterdiń ómirine qaýip tónýi múmkin" ekenin aıtyp, dabyl qaqqan.  

Keıin, 29 maýsym kúni Nurpeıisov óziniń áleýmettik jelidegi paraqshasynda "Jeke bas qaýipsizdigim men ornalasqan jerimdi jasyrý úshin  áleýmettik jelige kiretin uıaly telefonymdy qaldyryp, basqa jaqqa ketýge týra keldi. Sizdermen baılanysqa shyǵý úshin az kúsh jumsamadym. Men amanmyn, alaıda eki adam bolmaǵanda bári múldem basqasha bolar edi. Olarǵa 5 maýsym kúni keshke kórsetken kómekteri úshin alǵysymdy bildiremin. Men qazir Qazaqstandaǵy qaýipsiz jerdemin. Onyń qaıda ekenin jaqyndarym da bilmeıdi. Meniń qaıda ekenimdi týystarym arqyly anyqtaǵysy keletinderge budan túk shyqpaıdy dep aıtamyn, – dep jazǵan bolatyn.