Sarapshy: Almatynyń Qazaqstan ekonomıkasyndaǵy úlesi 20 paıyzǵa jýyq

Ekonomıst Zamır Qarajanov ótken jyly Almaty qalasy ekonomıkasynyń damýyna óz baǵasyn berdi. Mamannyń aıtýynsha, ótken jyldyń qorytyndysy boıynsha Almaty joǵary ekonomıkalyq nátıje kórsetti. Bul megapolıstiń damýyyń jalǵasyp jatqanyn, qalanyń ekonomıkalyq áleýetiniń saqtalǵanyn kórsetedi.

Aıta keterligi, 2023 jyly Almaty qalasynyń jalpy óńirlik ónimi naqty mánde 10,1% - ǵa ulǵaıyp, 24,8 trln teńgeni qurady, bul sońǵy 10 jyldaǵy rekordtyq kórsetkish bolyp tabylady. Ekonomıkany damytýdyń draıverleri óńdeý ónerkásibi (+17,5%), saýda (+14,5%), qarjy jáne saqtandyrý qyzmeti (+12,0%), Aqparat jáne baılanys (+11,3%), jyljymaıtyn múlikpen operasııalar (+6,9%), kólik jáne qoımalaý (+5,7%) boldy. Sarapshy qala respýblıkalyq bıýdjet donorlarynyń biri bolyp tabylatynyn atap ótti. Búgingi tańda Almatynyń Qazaqstan ekonomıkasyndaǵy úlesi shamamen 20% -dy quraıdy jáne bul aıtarlyqtaı eleýli kórsetkish. Qazir qalada qurylys, saýda jáne qyzmet kórsetý salalary belsendi damyp keledi.

«Almatyda elimizdiń shaǵyn jáne orta bıznesiniń ózegi shoǵyrlanǵan. Osy kásiporyndardyń sany boıynsha qala respýblıkada basqalardan ozyp tur. Bul Almatynyń odan ári damýyn aıqyndaıtyn bolady. Shaǵyn jáne orta bıznes óte ıkemdi, tez qaıta qurylady jáne qajet bolǵan jaǵdaıda jańa jaǵdaılarǵa beıimdeledi, ıaǵnı osylaısha óziniń básekege qabilettiligin, turaqtylyǵyn saqtaıdy. Ol dástúrli túrde jumys oryndaryn ashady jáne bul ádette otbasylyq bıznes. Onyń úlesi tek qyzmetter men saýda salasynda ǵana emes, sonymen qatar startaptar men basqa da salalarda óskenin qalaımyn. Sonymen qatar, qalada bilimdi halyqtyń úlesi joǵary, joǵary oqý oryndarynyń sany kóp, damý deńgeıi joǵary salalar úshin kadrlar daıarlaý júrgizilýde», - dedi Zamır Qarajanov.