«Kıeli meken»: Taza bolsa tabıǵat – aman bolar adamzat

Respýblıkalyq «Taza Qazaqstan» ekoaksııasynyń «Kıeli meken» aptalyǵy Taldyqorǵandaǵy Ilııas Jansúgirovtyń eskertkishinen bastaý aldy.

Elimiz boıynsha júrip jatqan kóktemgi ekologııalyq bastamaǵa I.Jansúgirov atyndaǵy Jetisý ýnıversıtetiniń stýdentteri qazaq poezııasynda óz orny bar aqynnyń óleńin oqýmen kiristi. Aldymen qalamgerdiń kópshilikke belgili jyryn oqyǵan bilimgerler ıgilikti sharany eskertkish turǵan aýmaqty tazalaýmen jalǵastyrdy.

Aqyn eskertkishi turǵan skver beker tańdalmapty. Sebebi, Jetisý jerin jyrǵa qosyp, tumsa tabıǵatty sózben sýrettegen aqyn, dramatýrg, prozashy, feletonshy, satırık, jýrnalıst jáne aýdarmashy Jansúgirovtiń bıyl týǵanyna 130 jyl tolyp otyr eken. Bul týraly «I.Jansúgirov atyndaǵy Jetisý ýnıversıteti» kommersııalyq emes aksıonerlik qoǵamynyń basqarma múshesi – jastar isi jónindegi prorektor Bolat Serıev:

– Qazaqstan Respýblıkasynyń Prezıdenti Qasym-Jomart Toqaev elimizdiń árbir óńirindegi tumsa tabıǵatty kózdiń qarashyǵyndaı saqtaý kerektigin udaıy aıtyp keledi. Soǵan oraı baǵdarlamalyq qujattar daıyndap, júıeli jumys júrgizý kerektigin tapsyrdy. Sol arqyly óskeleń urpaqtyń boıyndaǵy otanshyldyq rýhty oıatyp, patrıottyq sezimin ushtaý kerektigin jetkizdi, – dep máseleniń mánisin túsindirip ótti.

Memleket basshysy júktegen mindet qalalar men aýyldardy, aýlalar men baqshalardy, kósheler men kire beristerdi ózimiz tazartýymyz kerektigin uǵyndyrady. Sondyqtan Jetisý jurtshylyǵy tabıǵattyń tazalyǵyn aldyńǵy orynda ustaıdy.