Qazaqstan bıligindegi ákeli-balaly, aǵaly-inili shendiler kimder?

О́tip bara jatqan apta bıliktegi kóptegen aýys-túıistermen este qaldy. Biri ósti, biri tómendedi. Ádettegideı, kóbiniń orny ǵana almasty. Dese de taıaýda ǵana "saıası senim túgesildi" delingen Ǵabıdolla Ábdirahymovtyń úkimet basshysynyń keńesshiligine kelýi kútpegen jaǵdaı boldy. Al sol sózderdi aıtqan Qyrymbek Kósherbaev prezıdent ákimshiligi basshylyǵynan, memlekettik hatshy qyzmetine aýystyryldy. Mundaı kadrlyq taǵaıyndaýlarǵa belgili bir toptyń áseri bolýy múmkin degen áńgimeler aıtylyp júr. Negizi Qazaqstandaǵy qaı-qaı shendini almaıyq, áıteýir artynda bir tireýi turady. Ol kóbine ákesi nemese jaqyn aǵasy bolýy múmkin. Saıası sahna men sonyń aınalysynda júrgenderdiń arasyndaǵy ákeli-balaly, aǵaly-inili shendilerdi Qamshy.kz aqparat agenttiginiń tilshisi tizip kórdi.

Joǵaryda aty atalǵandardyń biri Qyrymbek Kósherbaevtyń ákesi Eleý Kósherbaev kezinde oblystyq dárejede kóp-kórim partııalyq qyzmetter atqarǵan. Qyzylorda oblystyq atqarý komıteti tóraǵasynyń orynbasary bolǵan. Qarmaqshy, Qazaly aýdandyq partııa komıtetteriniń 1-hatshysy qyzmetin atqarǵan.

Maqtaýly shopan, Sosıalıstik Eńbek Eri, KSRO joǵary keńesiniń depýtaty bolǵan Ábdir Saǵyntaevtyń uly Baqytjan Saǵyntaev búginde Almaty shaharynyń basshysy.

Qaraǵandy oblysyna ákim bolyp barǵan Jeńis Qasymbek uzaq jyldar prezıdent keńsesin basqarǵan memleket qaıratkeri Mahmud Qasymbektiń uly ekeni de kópke belgili. Al onyń baýyry Ardaq Qasymbek "Báıterek" ulttyq holdınginiń enshiles kompanııasy "Qazyna kapıtal Menedjment" aksıonerlik qoǵamynyń basqarma basshysy.

Jeńis Qasymbektiń týǵan jeri Jambyl oblysyna búginde Asqar Myrzahmetov basshylyq jasaıdy. Al bir kezderi "Qazaqstan Temir jolynyń" basshysy, kólik jáne kommýnıkasııa mınıstri bolǵan, 2003 jyly iri kólemde memleket qarjysyn qymqyrdy degen aıyppen isti bolyp, 5 jyl shartty merzimge bas bostandyǵynan aıyrylǵan onyń týǵan baýyry Abylaı Myrzahmetov qazir "Atamen" ulttyq kásipkerler palatasynyń basqarma tóraǵasy laýazymyn atqaryp júr.

Irgeles Túrkistan oblysynyń ákimi О́mirzaq Shúkeevtiń bir baýyry Serik Estaı "Beıneý-Shymkent gazqubyry" JShS-niń bas dırektory bolsa, inisi Berik Estaı sot salasynda isteıdi. Qaryndasy Lázzat Shókeeva Túrkistan oblysy boıynsha qazynashylyq departamentiniń basshysy.

Almaty oblysynyń ákimi Amandyq Batalovtyń úlken uly Ádilbek Batalov "QazTransGazAımaq" aksıonerlik qoǵamynyń bas dırektorynyń orynbasary qyzmetin atqarady.

Shyǵys Qazaqstan oblysynyń ákimi Danıal Ahmetovtyń uly Talǵat Ahmetov Qazaqstannyń eń baı elý adamdarynyń qatarynda. 2017 jylǵy málimet boıynsha onyń dáýleti 145 mln dollardy quraǵan. Bul kórsetkishpen Talǵat Danıaluly Forbes jýrnaly túzgen baı bıznesmender tiziminde 35-orynǵa jaıǵasqan.

Oblys ákimderiniń týystaryn Aqmola oblysynyń burynǵy ákimi Sergeı Kýlagınmen aıaqtalyq. Onyń uly Pavel Kýlagın eki jyldan beri Almatydaǵy Túrksib aýdanyn basqarady.

Ulttyq qaýipsizdik komıtetiniń eks-basshysy Nurtaı Ábiqaevtyń balasy Sergeı Nurtaev Qazaqstannyń Italııadaǵy Tótenshe jáne О́kiletti Elshisi bolsa, eks-senator Oralbaı Ábdikárimovtyń balasy Serjan Ábdikárimov Qazaqstannyń Cheh Respýblıkasyndaǵy Tótenshe jáne О́kiletti Elshisi.

Jýyrda "halyq memleketke tizerlep, alǵys aıtýy kerek" degen daýly málimdeme jasaǵan májilis depýtaty Vladımır Bojkonyń balasy Maksım Bojko Aqmola oblystyq máslıhatynyń depýtaty, "Shańyraq" holdınginiń quryltaıshylarynyń biri, "Aqmola-Fenıks" aksıonerlik qoǵamynyń bas dırektory.

Al QR Premer-Mınıstriniń orynbasary Berdibek Saparbaevtyń týǵan inisi Nurlybek Nálibaev 2013 jyldan beri Qyzylorda qalasynyń ákimi retinde eńbek etip keledi. Al onyń uly Jansultan Saparbaev bıyl sáýirde Nur-Sultan qalasy Esil aýdany ákiminiń orynbasary qyzmetine taǵaıyndaldy.

Múslim Altynbaev bul kúnderi 1996-1999 jáne 2001-2007 jyldary qorǵanys mınıstri bolǵan ákesi, eks-senator Muhtar Altynbaevtyń jolyn qýyp, qorǵanys mınıstriniń orynbasary bolyp qyzmet isteýde.

Burynǵy senat depýtaty Erlan Nyǵmatýlınniń qyzy Malıka Bektýrova Nur-Sultan qalasy ákiminiń orynbasary.

Taǵy bir eks-senator Qýanysh Aıtahanovtyń balasy Erlan Aıtahanov qazir Shymkent qalasynyń ákimi.

Sý jańa Indýstrııa jáne ınfraqurylymdyq damý mınıstri Beıbit Atamqulovtyń týǵan inisi Mádı Atamqulov uzaq jyl Prezıdent protokolynyń bastyǵy boldy.

Zeınet demalysyna attanǵan Ádilbek Jaqsybekovtyń uly Dáýren Jaqsybekov kezindegi "Sesnabanktiń" dırektorlar keńesine tóraǵalyq etti. Qazir qaıda ekeni belgisiz.

"Asia Credit Bank" men "Oral" halyqaralyq áýejaıynyń ıesi Nurbol Sultan burynǵy prezıdent isteriniń eks-basshysy, marqum Sarybaı Qalmyrzaevtyń balasy.

Dúnıejúzi qazaqtary qaýymdastyǵy Tóraǵasynyń birinshi orynbasary Zaýytbek Turysbekovtyń balasy Asqar Turysbekov "Petro Kazahstan Oıl Prodakts" kásipornynyń birinshi vıse-prezıdenti.

Májilis tóraǵasy Nurlan Nyǵmatýllınnyń uly Nurjan Nurlanov "QazMunaıGaz-Aero" kompanııasynyń bas dırektory.

Parlamet Senatynyń depýtaty, spıker orynbasary Bektas Beknazarovtyń uly Narıman Beknazarov bolsa, Astanadaǵy aýdanaralyq mamandandyrylǵan Sottyń tóraǵasy.

Osylaı jalǵastyra berse, bılik pen kvazımemlekettik kompanııalar jáne ulttyq holdıngterdiń basshylyǵynda júrgender bir-birine jaqyn týys, kúıeý bala, quda-jekjat bolyp kete beredi.