Tuńǵyshbaı Jamanqulov: Mınıstr keshe ǵana ketti ǵoı endi, jaǵdaı ózgerer dep oılaımyn

Jýyrda tanymal óner qaıratkeri, akter, Qazaqstan teatr qaıratkerleri odaǵynyń tóraǵasy Tuńǵyshbaı Jamanqulov memleket basshysy Qasym-Jomart Toqaevtyń qabyldaýynda bolǵany belgili. Sońǵy jyldary basy daýǵa qalyp, isti bolǵan ısi qazaqqa tanymal óner adamy prezıdentpen ákeýara áńgime ne týraly bolǵanyn Zakon.kz tilshisine aıtyp berdi, dep jazady Qamshy.kz aqparat agenttigi.

– Siz ol kisige ne aıttyńyz?

– Men Qazaqstandaǵy teatrlardyń, shyǵarmashylyq toptardyń áleýmettik jaǵdaıynan, ishki ómirinen syr sherttim. Sóıtip jatyrmyz, búıtip jatyrmyz degen ótirik, ústirt aqparat emes, shynaıy aqparatty barynsha shynaıy habardar ettim. Qysqasha, bos sózderge barmaı bárin aıtyp berdim. Akterlik sheberliktiń, rejıssýranyń kemshin tustary baryn aıttym. Bizde birli-ekili jaqsy rejısserler bar, degenmen de, jalpy teatrlarda mamandardyń jetispeıtini, akterlerdiń óz ónerine ústirt qaraıtyndyǵyn sóz ettim. Jer-jerlerdegi teatrlarda basshylardyń teatrlarǵa jáı ánsheıin qarap, tek merekelik kezderde ǵana eske alatyny bar. Sahnalardaǵy bolyp jatqan shynaıy shyǵarmashylyq oqıǵalarǵa eleń etetin áreketterdiń bolmaı jatqanyn aıttym. Arqadan qaǵý joq. Aılyq az. Áp-bárekeldi dep jatqan eshkim joq. О́reli, bilimdi mamandar az. Bul syn aıtý degen jat ta kep synaı berý emes, bizdiki spektaklderdi taza shyǵarmashylyq taldaý. Prezıdent munyń bárin uıyp tyńdady.

– Prezıdent qandaı reaksııa tanytty?

– Aılyq óte az dedim. Ol kisi teatr jumysshylarynyń jalaqysy qandaı ekenin estigende, basyn shaıqap, tipti únjyrǵasy túsip ketti. Jaman jaǵdaıǵa tústi. Bizdegi ulttyq teatrlarda eń úlken aılyq 35-40 myń teńge tóńireginde, keletin jastar tipti 20 myń teńgege jumys isteýge májbúr.

– Ýáde berdi me?

– Ýáde bergeni sol, mádenıet mınıstrligine tapsyrma beretinin aıtty. Teatr ujymdarynyń shyǵarmashylyq órelerin yntalandyrý, múmkindikterin arttyrý, qoǵamdaǵy ornyn, áleýmettik jaǵdaıyn kóterý kerek degendi aıtty. Qazaqstan teatr qaıratkerleriniń odaǵy bul sheneýnikter mekemesi emes, memlekettik mekeme emes, qoǵamdyq uıym. Bul profsoıýz, kásipodaq ta emes, bul – shyǵarmashylyq uıym. Iаǵnı, árbir teatrdyń sahnasyndaǵy shyǵarmashylyq óreniń, rejıssýra, akterlik oıynnyń, tipti teatr synynyń jaǵdaıyn kóterýdiń qamymen júretin kedeı-jomart adamdarmyz. Sony jan-jaqtan mamandardy shaqyryp, akterlermen kezdestirip, rejısserlerdi oqýǵa jiberip, álemdik teatrlardyń jarqyraǵan juldyzdarymen kezdesý, oqýlar uıymdastyrýdyń esh sókettigi joq.

– Qazir kınolarǵa túsip jatqan joqsyz ba?

– Qazir eshqandaı kınoǵa túsip jatqan joqpyn, óıtkeni burynǵy mınıstr meni kınoǵa túsirýge tyıym salǵan. Rejısserlerdi qorqytyp qoıǵan. Eger Jamaqulovty kınoǵa túsirseń, seniń kınoń ekranǵa, prokatqa shyqpaıdy dep qoıǵan. Ashy shyndyǵy osy.

– Mınıstr aýysyp ketti emes pe? Boldy ǵoı?

– Eski mınıstrdiń izderi áli saırap jatyr ǵoı. Ol mınıstrdiń yqpaly áli bar. Onyń ústine, qazirgi mınıstr áıel adam. Burynǵy mınıstr aspanǵa ushyp ketken joq. Áli de júr. Áı, ne istep jatsyń dep áli de kóp jerlerge baryp, zvondap, jaǵdaıdy baqylap otyr emes pe? Mınıstr keshe ǵana ketti ǵoı endi, jaǵdaı ózgerer dep oılaımyn. Basqa ne deıin?! Burynǵy mınıstr jasap tastaǵan kedergiler, kereǵar sheshimderi ázirge áli de aldymyzdan shyǵyp otyr.