S. Kenjebek, balalar úıiniń túlegi: 22 jyldan soń anamdy taýyp, sotqa berdim(Foto. Vıdeo)

О́tken kúnderdi kelmeske ketti deımiz ǵoı. Kóbine zýyldap ótip jatqan ýaqytqa ókinetin bolarmyz. Al qınalǵan sátterdiń kerisinshe ótken shaqtyń úlesinde qalǵanyna qýanamyz. Biraq ótken shaqtyń kúnási sizdi bir kúni uıqyńyzdan túrtip oıatsa qaıter edińiz? Kimniń kúnási qanshalyqty ekenin bezbenge salýǵa haqyly emespiz. Tipti bireýdiń kúnásin kórip turyp, sen bir kezde kúnáhar ediń ǵoı dep aıtýdyń ózi aıyp bolar. Sebebi Haq taǵalanyń keshirip, keshpegenin de paryqtaıtyn biz emes. Balalar úıinde tárbıelengen Serik Kenjebekov bizdiń redaksııamyzǵa at basyn buryp, buıymtaıyn aıtty. Qus ta jumyrtqalaý úshin aldymen uıa salady On jeti jasymda balalar úıiniń qabyrǵasynan úlken álemge qadam bastym. Úısiz júrgen kezderim de boldy. Retin taýyp Almatydaǵy «Januıa» jataqhanasyna ornalasqan bolatynmyn. Onda jıyrma toǵyz jasqa deıin turýǵa bolady dep oılaýshy edim. Biraq komendant ashyq túrde aıtpasa da, «munda januıaly jetimder panalaı alady, al sen jalǵyz óziń bir bólmeni alyp otyrsyń» degendi emeýrinmen jetkizip keledi. Bir kúni ymǵa túsinbegen, dymǵa da túsinbeıdi dep, ashyq túrde aıtatynyna senimdimin. Oqıǵa dál solaı órbip, meniń januıa qurmaı jataqhanada turyp jatqandyǵymdy alǵa tartsa, men dalada qalǵaly turmyn. Maǵan kómek qolyn soza alatyn azamattar bar ma eken? Men januıa qurýǵa áli daıyn emespin ǵoı. Qudaı-aý, «torǵaı ekesh torǵaıdyń ózi» jumyrtqalaý úshin aldymen uıa salyp alady ǵoı. Al men baspanasyz qalaı úılenemin? О́zim jetimdiktiń azabyn ábden tarttym. Balalarymnyń páterden páterge kóship júrgenin qalamaımyn. Sondyqtan jataqhanada qalý úshin úılený kerek degen sózdi men múldem túsinbeımin. «Januıa» jataqhanasynan bólek, «Jastar» úıi degen de bar. Biraq men basynan ol jerden oryn almaǵanmyn. Sebebi «jetimder úıiniń balalary qylmysqa jaqyn keledi, olar aıaý degendi uqpaıdy»,- degen pikirdi ózgertkim keledi. Al kúlli qoǵamnyń pikirin ózgertý úshin óziń de ózgerý kerek qoı. Osy oımen ol jerden oryn almap edim, endi panalaıtyn úı muńǵa aınalyp barady. Anamdy taýyp, sotqa júgindim Balalar úıinde júrgende anamnyń jamalyn kórý armanym bolatyn. Muqaǵalı aqyn «Baqyt degen seniń bala kezderiń» dep jyrǵa qosqan ǵoı. Al ondaǵylar baqyt jaıynda basqasha túsinikte. Men de baqyt balalar úıiniń qabyrǵasynyń tysynda deı oılaıtynmyn. Osylaısha AHAJ bólimi men perzenthanalardy sharlap tabanymnan tozdym. Týý týraly kýáligimde anamnyń aty jazylyp tur. Sol arqyly izdedim. Anamnyń menen bas tartý qaǵazyn perzenthana muraǵatynan taptym. Osylaısha sheksiz qýanyshpen anama qońyraý shaldym. «Kele ǵoı, balam»,- dese, sol sátte qos ókpemdi qolyma ustap jetip barar edim. Alaıda anam meni kórgisi kelmeıdi eken. Men ol úshin jıyrma úsh jyldan soń, adam obrazynda tirilip kelgen kúná sekildi áser qaldyrdym. Ashýlandym. Jýrnalısterdiń kómegine júgindim. Jýrnalıster aralasqan soń meni kórýge keletin shyǵar dep oılaǵanmyn. Alaıda anam maǵan júregin jylyta qoımady. Sosyn sotqa júgindim. Sot nátıjesi meniń jeńisimmen aıaqtaldy. Anam menen bas tartqany úshin aıyppul tóleıtin boldy.Bulaı jasaý maǵan ońaı tımedi. Sebebi ol meniń qııalymda jaqsy minezdermen qashalǵan keıipker bolatyn. Keıbir adamdar men dúnıege kelgen jyl-aýyr jyl boldy dep meni jubatqysy keledi. Biraq aýyr eken dep búkil analar 1991 jyly balasyn tastap ketken joq qoı. Anam ol kezde on alty ǵana jasta bolǵan eken. Áli óziniń býyny bekimegen, meni jetkizý qıyn bolar dep te ózimdi jubatatynmyn. Al qazir menimen qaýyshýǵa ne kedergi. Ras ol odan soń januıa qurdy. Eki qyzy bar eken. Ras-ótirigin bilmeımin, biraq qyzdary ákesimen birge turady eken. Al anam óz týystarymen ǵumyr keship jatsa kerek. Osylaısha men ómirge kelgennen keıin bes kúnnen soń anam menen jeripti. Damýshy elmiz ǵoı. Meniń aıaýly qoǵamym, sizder menen jerimeńizder. Meniń baspanamnyń máselesin sheshýge qolushyn sozsańyzdar eken. Men sizderge senemin. Jaqsy adamdar bar ǵoı. Jumyla kóterip, talqylap, maǵan kómektesersizder.

https://youtu.be/XD0Jiay4HqQ