Kitap oqýdan qalyp baramyz ba?

«Eýrazııa álemi» pikir saıys klýbynyń kezekti basqosýy «Eýrazııa elderin biriktirýdegi kitap fenomeni» atty taqyrypqa arnaldy.

Saıasattanýshy Edýard Poletaevtyń aıtýynsha, bıylǵy jyl TMD-da Kitap jyly bolyp jarııalanǵan.

«Kitaptyń qundylyǵy men kitap oqýǵa degen qushtarlyqty arttyrý úshin jalǵyz ǵana kitap kórmelerin ótkizgen azdyq etedi. Qazaqstanda avtor men oqyrmannyń jaqyndastyratyn, Batys elderinde baıaǵydan bar tásildi jolǵa qoıý kerek. Bizdiń elde kitap qundylyǵyn joǵaltqan joq, biraq oǵan degen oqyrman suranysy tómendep barady. Al munyń arty rýhanı jutaýǵa ákelýi múmkin...» dedi ol.

Al saıasattanýshy Aıgúl Omarova óz kezeginde bizde tanymal avtorlardyń shyǵarmashylyq keshin jıi ótkizý qajettigin tilge tıek etti.

«Teledıdar toly shoý-bıznes ókilderi. Arzan ázil kórermenniń sanasyn tumshalap barady. Halyqtyń qazirgi degradasııadan qutqaratyn birden bir jol – kitap. Ony qaǵaz kúıinde me, ınternet arqyly ma, aýdıojazba kómegimen be, qalaı oqyǵany mańyzdy emes. Oqyrman saýattylyǵyn arttyrýda barlyq tásil tıimdi» - dedi.

Qazaqstan kommýnıkatıvtik qaýymdastyǵynyń dırektory Baǵılá Ahatovanyń pikirinshe búgingi ádebıettiń mıssııasy – ol oqyrmandy ózine beıimdeý. «Oqylatyn, oqyrmanǵan bereri bar qyzyqty shyǵarma bolsa, qansha bet bolsa da oqylady, qansha jańalyǵy men eskiligi bolsa da jurt aýzynda júredi» - dedi ol.

Sharaǵa qatysqan ózge de sarapshylar qazir ıntellektýaldy ádebıetke suranys joǵary ekenin aıtyp, kitap salasyn osy baǵytqa burýdy usyndy.

Usynǵan: Nazerke Labıhan