Atyraýda balabaqshadaǵy 4 jasar balanyń ólimi: Mekeme dırektory men tárbıeshi sottaldy

Sot málimetinshe, azamat S. 2023 jyldyń 21 mamyrynda ruqsat qujattaryn alyp, óz atyna jeke kásipkerdi tirkep, "Chebýrashka" kvazımemlekettik balabaqshasyn ashqan. Ol úshin 2023 jyldyń 26 ​​mamyrynda Atyraý qalasynda eki qabatty úıdi jalǵa alǵan. 2023 jyldyń 7 shildesinde balabaqsha dırektorynyń buıryǵymen azamat D. tárbıeshi bolyp jumysqa qabyldanǵan. Fýnksıonaldyq mindetterine sáıkes sottalýshylar balalardyń ómiri men qaýipsizdigine jaýapty bolǵan. 

“2020 jyly týǵan kámeletke tolmaǵan M. tárbıeshi D. esimdi azamattyń tobyna 2023 jyldyń 1 qarashasynda qabyldanǵan. 2024 jyldyń 10 shildesinde shamamen saǵat 10:45-te áıel balany qaraýsyz qaldyrǵan. Sonyń saldarynan ol káriz qudyǵyna qulap, mert bolǵan. Sottalýshylar óz kinálaryn tolyq moıyndady”, – delingen habarlamada. 

Prokýror olardy 3 jyl merzimge bas bostandyǵynan aıyrýdy jáne 3 jylǵa pedagogıkalyq jáne kámeletke tolmaǵandarmen jumys isteýge baılanysty laýazymdardy atqarý quqyǵynan aıyrýdy surady. Áıelder men olardyń qorǵaýshylary bas bostandyǵynan aıyrmaýdy ótindi.

Sot balabaqsha dırektorynyń jaýaptylyǵyn jeńildetetin mán-jaılar retinde kinásin moıyndaýyn, otbasylyq jáne densaýlyq jaǵdaıyn eskerdi.  Sondaı-aq tárbıeshiniń kinásin moıyndaýyn, asyraýynda kámeletke tolmaǵan balalarynyń bolýyn esepke aldy. 

"Sottalýshylar Qylmystyq kodekstiń 141-babynyń 2-bóligimen (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý) kináli dep tanyldy. Olar 3 jyl merzimge oqytýshylyq jáne kámeletke tolmaǵandarmen jumys isteýge baılanysty laýazymdardy atqarý quqyǵynan aıyryldy. Aıyptalýshylarǵa 2 jyl 6 aıǵa bas bostandyǵynan aıyrý jazasy taǵaıyndaldy. Qylmystyq kodekstiń 63-babyn (Shartty túrde sottaý) qoldanyp, belgilengen merzimge probasııalyq baqylaý belgilenip, jazany shartty túrde óteıtin boldy", – delingen habarlamada.