Zaıtov halyqpen kezdesýden qashatyn shendilerdi synady

Májilis depýtaty Rınat Zaıtov QR ÁRPK 90-babynyń 1-tarmaǵyna saı, memlekettik organdardyń basshylary men olardyń orynbasarlary aıyna keminde bir ret azamattardy jáne zańdy tulǵalardyń ókilderin jeke qabyldaýǵa mindetti ekenin málim etti. 

Depýtat sot júıesiniń basshylary da «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasynyń Konstıtýsııalyq zańyna saı azamattardy jeke qabyldaýy tıis ekenin jetkizdi. Biraq buny oryndap jatqandar shamaly.

– Sonda, jalǵyz balasy jalamen sottalǵan ana, jarynyń jumbaq qazasy, jyldap tergelmegen áıel, áskerdegi uly múgedek bolyp qalǵan áke, kásibinen zańsyz aıyrylǵan kásipker, jalǵyz baspanasy alaıaqtarǵa qoldy bolǵan otbasy, sot sheshimin oryndata almaı júrgen jábirlenýshiler t.s.s. myńdaǵan qorǵansyz halyq ádildikti qaıdan tappaq? Bilseńizder aıtyńyzdarshy! Halyqtan qashpańyzdar, – deıdi depýtat.

Zaıtov depýtattyq saýalynda Bas prokýrotýr Berik Asylovtan osy máseleniń sheshilýin qadaǵalaýdy surady.

– Joǵaryda aıtylǵandy eskere otyryp, Sizderden atalǵan laýazymdy tulǵalar men halyqtyń arasynda kedergisiz baılanys ornatý joldaryn qarastyrýlaryńyzdy jáne azamattardyń aryzdary syrǵytpa jaýap (otpıska) deńgeıinde qalmaýyn qadaǵalaý júıesimen qamtamasyz etýlerińizdi, tipti bolmasa, depýtattardyń esigi kórinbeıtin kabınetterge eldiń ótinishin jetkizýge múmkindik berýlerińizdi Qazaqstan Respýblıkasy Parlamenti Májilisi Reglamentiniń 11-taraý 149-tarmaǵyna sáıkes talap etemin! Elimizdegi azamattardyń zańdy talaptarynyń oryndalýyn qamtamasyz etetin organ retinde Bas prokýrotýra tarapynan atalǵan máselelerde tabandylyq tanytýlaryńyzdy suraımyz, – deıdi Zaıtov.