Kásipker «Balany mektepke daıarlaıyq!» naýqany aıasynda kópbalaly otbasylarǵa kómek kórsetti

AMANAT partııasy Almaty oblystyq fılıaly Qonaev qalasynda «Balany mektepke daıarlaıyq!» atty qaıyrymdylyq aksııasyn ótkizdi. Bul sharanyń negizgi maqsaty – kópbalaly otbasylar men jańa oqý jylyna daıyndalyp jatqan balalarǵa aýqymdy kómek kórsetý. Aksııada partııanyń belsendi múshesi ári kásipker Baqyt Naımanuly Altaev mańyzdy ról atqardy.

Aksııa aıasynda partııalyq 20 mektep sómkesin jáne tolyqqandy oqý quraldaryn balalarǵa syıǵa tartty. Ár sómke dápter, qalamdar, qaryndashtar, syzǵyshtar jáne basqa da oqý quraldarymen jabdyqtalǵan. Bul kómek kópbalaly otbasylardyń balalaryna oqý jylyn sátti bastaýǵa jáne oqý prosesine tolyqtaı nazar aýdarýǵa múmkindik berdi.

Baqyt Altaev óz sózinde: «Balalardyń bilim alýyna qoldaý kórsetý bizdiń áleýmettik jaýapkershiligimizdiń bir bóligi ǵana emes, sonymen qatar olardyń bolashaǵyna úles qosý múmkindigi bolyp tabylady. Biz otbasylarǵa qajetti oqý quraldaryn qamtamasyz ete otyryp, balalardyń oqý prosesine alańdamaı, tolyqtaı nazar aýdarýy úshin qoldaý kórsetýge tyrystyq», – dep atap ótti.

«Balany mektepke daıarlaıyq!» aksııasy qoǵamnyń áleýmettik bastamalarǵa degen qamqorlyǵyn kórsetip, balalardyń bilim alýyna kómek kórsetý qajettiligin aıqyndady. Partııanyń kómegi balalardyń oqý jylyna daıyndalýyn jeńildetip, kópbalaly otbasylardyń ómirin jaqsartýǵa aıtarlyqtaı áser etti.

Aıta ketý kerek, aksııa AMANAT partııasynyń áleýmettik jaýapkershilik pen qoldaý kórsetý baǵytyndaǵy aýqymdy bastamalarynyń bir bóligi.

AMANAT partııasy Almaty oblystyq fılıalynyń baspasóz qyzmeti