Demografııalyq saıasat: Balalarǵa áleýmettik kómek berildi

Almaty oblysynda «Mektepke jol» aksııasy boıynsha ári áleýmettik-turmystyq jaǵdaıy tómen otbasylarǵa kómek retinde jyldaǵy dástrúr boıynsha naýqan ótkizilýde.

Bul shara birinshiden, demografııalyq saıasatty júzege asyrý bolsa, ekinshiden, otbasylyq qundylyqtardy nyǵaıtý, áleýmettik-demografııalyq saıasatty júzege asyrý bolyp tabylady. Jylda ótetin naýqan bıyl da óz qundylyǵyn joǵaltpaı jalǵasýda. Sonyń arqasynda san myńdaǵan bala mektep formasy men oqýǵa qajetti qural-jabdyqtarmen qamtamasyz etilýde. Bul naýqan kelesi aıdyń, ıaǵnı tamyz aıynyń jıyrmasyna deıin jalǵasady.

Oblystyq bilim basqarmasynyń bas mamany Dýman Daýlethanulynyń aıtýynsha,  oblysta 432 memleketitk mektep bar bolsa, onda oqıtyn  50 myń bala áleýmettik kómekke muqtaj. Jáne, bıyl da oqýshylarǵa jyldaǵydaı kómek kórsetiledi.

Sonymen qatar Almaty oblysy bilim basqarmasynyń «Orta bilimdi damytý» bóliminiń bas mamany Aıymgúl Saınqyzy:

Osy jyly ár oqýshyǵa oqý quraldaryn alýǵa 43 407 teńgeden qarjy bólindi. Tek balanyń qamqorshysy qarajat esepshotyna túskennen keıin qarjynyń qaı saýda ortalyǵyna jumsalǵandyǵy týraly esep ótkizýi tıis.  Oblysta ata-anasynyń qamqorlyǵynsyz qalǵandar men áleýmettik az qamtylǵan, jetimderge, tótenshe jaǵdaı saldarynan zardap shekken otbasydan shyqqan 14012 balanyń zańdy ókilderine 608,2 mıllıon teńge aýdaryldy. Naýqannyń bastalǵanyna sanýly kún ǵana, alda bul jumystar jalǵasyn tabady», — deıdi Aıymgúl Saınqyzy.

Odan bólek, mamandardyń sózinshe, áleýmettik jaǵdaıy tómen otbasylarǵa kórsetiletin materıaldyq kómek kólemi sońǵy 3 jylda 2,5 ese artqan. Máselen, buǵan deıin 17 myń teńge bolsa, qazir bul soma 43407 teńgege ósken. Al materıaldyq kómekti alý úshin ár ata-ana ne zańdy qamqorshysy mektep dırektorynyń atyna ótinish jazý qajet.