85 jastaǵy qyzylordalyq qarııa 2 mıllıon túp aǵash ekken

Qart baǵbannyń esimi — Bektaı Súleımenov. Ol aınalasyn jasyl-jelek qylyp, aǵash otyrǵyzýdy 12 jasynda bastapty. Keıin bul isin kásipke aınaldyrǵan. Qazirge deıin ózi ekken taldarynyń sany 2 mıllıonǵa jetip jyǵylady eken.

- Qyzylordanyń topyraǵy tuzdy. Munda aǵash ekseń ólip qalady deıdi kóbi. Biraq ol jalqaýdyń sózi. Qylqan japyraqtylardy 11 jyl buryn ektim. Qazir 5 metrge deıin ósti, - deıdi Bektaı Súleımenov.

Rasymen, Syr óńiriniń aýasy qurǵaq, topyraǵy tuzdy bolǵandyqtan kópshilik munda ekken aǵashtar birden ónip kete bermeıdi dep oılaıdy. Biraq aqsaqal muny joqqa shyǵarady. Babyn tapsa, kez kelgen ósimdikti jersindirip, jaıqaltýǵa bolatynyn aıtady.

Qazir ózim baptap otyrǵan baqta taldardyń 20 túri ósip tur. Onyń ishinde jemis aǵashtary da bar. Jalpy sany 2 myń túpten asady. Tipti tropıkalyq anar aǵashynan jemis alyp otyrmyn. Tek tásilin bilý kerek, erinbeý kerek, - deıdi qart baǵban.

Bektaı Súleımenov aýmaǵy úlken baqty ózi kútip, baptaıdy. Kómekshisi — qudaı qosqan qosaǵy. Aıtsa sengisiz, biraq baǵbannyń baǵyna kelip turǵan sý joq. Ol mundaǵy jaıqalyp turǵan aǵashtardyń barlyǵyn nasos qondyrǵysymen-aq sýaryp otyr.