«Eır Astananyń» qazaq tilinde qyzmet kórsete almaýy - óte ókinishti! - Dýlat Tastekeı

Qazaq tiliniń janashyry, «TAS GROUP» kompanııasynyń basshysy Dýlat Tursynuly «Eır Astana» áýekompanııasymen jıi ushatynyn ári ár ushqan saıyn bortserikterdiń 85-90 paıyzy qazaq bolsa da, ana tilinde qyzmet kórsetýge asyqpaıtynyn áleýmettik jeke paraqshasynda jazdy. Sondaı-aq mesenat kompanııa basshylyǵy til máselesin tez arada sheship, oǵan beıjaı qaramaý kerektigin, tipti qajet bolsa seriktes retinde kompanııaǵa qazaq tilin engizý joldary týraly pikir almasýǵa daıyn ekenin  aıtady.

Otandyq áýekompanııalar jaıly sóz qozǵaıtyn bolsaq, esimizge birinshi bolyp «Eır Astananyń» túsetini haq. «Eır Astana» – álemdik avıasııa naryǵyndaǵy aldyńǵy qatarly, sapasy, qyzmet kórsetý deńgeıi jaǵynan shoqtyǵy bıik kompanııalardyń biri. Tek bir ókinishtisi – kompanııa qyzmetkerleriniń áli kúnge deıin óz ana tilinde laıyqty deńgeıde qyzmet kórsete almaýy. Bortserikterdiń shamamen 85-90 paıyzy ózimizdiń qara kóz qazaqtar bolǵanyna qaramastan, kópshiligi qyzmetti orys tilinde kórsetýge asyǵady. Munyń sebebi kompanııa basshylyǵynyń durys talap qoıa almaýynda ma, álde bul qalyptasyp qalǵan ádet pe?
Kópke topyraq shashýǵa da bolmaıdy. Qazaq tilinde ádemi qyzmet kórsetip, qulaq quryshyńdy qandyratyn bortserikter de joq emes, bar. Mysaly, jaqynda Almatydan Bangkokqa ushqan saparymda Pavel esimdi bortserik maǵan bastan-aıaq qazaq tilinde óte tamasha qyzmet kórsetti.
Men, Halyqaralyq «Qazaq tili» qoǵamynyń vıse-prezıdenti jáne jaı ǵana óz tiline jany ashıtyn qazaqtyń uly retinde «Eır Astana» kompanııasynyń aıtylǵan syndy durys qabyldap, bul máselege beıjaı qaramaı, tıisti sharalar qoldanýyn suraımyn. Tipti basshy retinde kompanııaǵa qazaq tilin engizý joldary týraly pikir almasýǵa da árdaıym ashyqpyn. Al, sizder «Eır Astanamen» jıi ushasyzdar ma? Otandyq áýekompanııalarynyń qyzmetkerleri sizderge qaı tilde qyzmet kórsetedi? Sizder birinshi kezekte qazaq tilinde qyzmet kórsetýdi suraısyzdar ma?, – deıdi til janashyry Dýlat Tastekeı.