Nurlan Noǵaev áleýmettik nysandardyń qurylysyn baqylaýdy kúsheıtýdi tapsyrdy

1 aqpanda Nurlan Noǵaev jumys saparymen Boranqul jáne Eset aýyldaryna bardy. Aýyldaǵy áleýmettik nysandardyń jumysymen tanysyp, turǵyndarmen kezdesti, - dep habarlaıdy Mańǵystaý oblysy ákiminiń baspasóz qyzmeti.

Eń aldymen Boranqul aýylyndaǵy 610 bala oqıtyn orta mektepke bardy. Mektepte 96 muǵalim jumys isteıdi. Aýylda barlyǵy 1 814 oqýshy bolsa, oǵan 270-ten astam muǵalim bilim beredi.
Qazirgi tańda Boranqul aýylynda 7800-ge jýyq halyq turady. 240 oryndyq aýyldyq klýby men 17 600 kitaby bar kitaphana aýyl turǵyndary úshin qyzmet etýde. Aýyl sharýashylyǵy salasy da qarqyndy damyp jatyr. Jalpy aýylda 49 sharýa qojalyǵy bolsa, onyń 3-i - jylyjaı kesheni, al qalǵandary mal sharýashylyǵymen aınalysady.

Aımaq basshysy áleýmettik nysandarmen tanysqannan soń aýyl turǵyndarymen kezdesti. Kezdesý erkin formatta ótti. Aýyl turǵyndary jumyspen qamtý, jol men oıyn alańdaryn salý, aýyldyq saıabaq salý, kóshelerdi jaryqtandyrý, medısınalyq mekemelerdi kadrlarmen qamtamasyz etý, uıaly jáne ınternet baılanysynyń sapasyzdyǵy, turmystyq, qurylys qaldyqtaryn shyǵarý jáne kádege jaratý, sondaı-aq aýdandaǵy atqarylyp jatqan jumystarǵa qatysty saýaldaryn qoıdy.

Oblys ákimi aýyldardy damytý josparynyń jáne memlekettik baǵdarlamalardyń ýaqytyly oryndalýyna baqylaý júrgizýdi tilge tıek etti. Sonymen qatar «Tyńdaýshy memleket» qaǵıdasyna sáıkes, azamattardyń ótinishterine jedel jaýap beretin «Mańǵystaý oblysynyń ákimdigi» arnaıy telegramm chaty iske qosylǵanyn atap ótti (https://t.me /mangystauakimat). Munda eń shalǵaı ornalasqan eldi mekenderdiń turǵyndary óz saýaldary men ótinishterin joldap, aryz-shaǵymdaryn jazyp, ótinishterine jaýap ala alady.

– Oblys ákimdiginiń arnaıy telegramm chaty týraly bilýińiz kerek, oǵan ár saladaǵy jumystarǵa qatysty suraqtaryńyzdy, usynystaryńyzdy, ótinishterińizdi jáne shaǵymdaryńyzdy joldaýǵa bolady. Chatqa kelip túsetin suraqtardy jeke ózim, meniń orynbasarlarym, barlyq basqarma men bólimniń basshylary qadaǵalap, taldap otyramyz. Árbir memlekettik organ óz baǵytyna jaýapty bolady. Búgingi tańda chatta 14 myńǵa jýyq adam bar. Bul óz kezeginde osal tusty tez anyqtaýǵa, ótinishterińizge jaýap berýge múmkindik beredi, – dedi Nurlan Noǵaev.

Jumys sapary barysynda aımaq basshysy Boranqul aýylyndaǵy sport nysanynyń qurylys jumysyn synǵa aldy. Sport nysanynyń qurylysy byltyr aıaqtalýy tıis bolatyn. Alaıda qazirgi tańda jalpy jumystyń 30 paıyzy ǵana oryndalǵan.

– Kelisim boıynsha alǵan mindettemelerdi nege oryndamaısyz? Jumystyń oryndalýy, sapasy men merziminiń saqtalýy sizdiń jaýapkershiligińizde ekenin umytpańyz. Qandaı táýekelder bolatynyn bilip, kelisim-shartqa otyryp, jaǵdaıdy óz qolyńyzda ustadyńyz. Al endi qurylys materıaldarynyń qymbattaýyna baılanysty jumysty ýaqytyly bitirip úlgermedim deısiz. Kútpegen jaǵdaılarda arnaıy is-qımyl jospary bolýy kerek edi. Eger siz ár kezeńdi óz ýaqytynda aıaqtaǵan bolsańyz, qazir mundaı problemalar bolmas edi. Qysqa merzimniń ishinde barlyǵyn túzetip, kestege saı jumys isteýińiz kerek. Olaı bolmasa, kelisimshartty buzý jáne basqa merdigerdi izdeý bastalady. Osy rette memlekettik organdar halyqqa qajetti áleýmettik nysandardyń qurylysyn baqylaýdy kúsheıtýi kerek. Nysan qurylysy sapaly jáne merziminde aıaqtalýy tıis, - dedi Nurlan Noǵaev.

Tústen keıin Nurlan Noǵaevtyń jumys sapary Eset aýylynda jalǵasty. О́ńir basshysy orta mekteptiń jaı-kúıimen tanysyp, aýyl turǵyndarynyń saýaldaryna jaýap berdi. Kezdesýde Eset aýylynyń turǵyndary jańa mektep salý qajettigin alǵa tartty.

– Memleket basshysy Qasym-Jomart Toqaevtyń tapsyrmasy boıynsha elde «Jaıly mektep» ulttyq jobasy júzege asýda. Osy joba aıasynda Eset aýyly turǵyndarynyń tilegi eskerilip, aýdannyń damý josparyna zamanaýı talaptarǵa saı keletin jańa, keń mektep salý engizildi. Aýylda sapaly bilim alýǵa baǵyttalǵan jumystardy jalǵastyramyz, - dedi Nurlan Noǵaev.

Sodan soń Nurlan Noǵaev Beıneý aýylyndaǵy sý tazartý qondyrǵysynyń jumysymen tanysty. Sý tazartý qondyrǵysy 2017 jyly iske qosyldy. Stansııa táýligine 12 myń tekshe metr aýyz sý óńdeýge qaýqarly.

Sısternalardyń syıymdylyǵy - 45 myń tekshe metr. Kásiporynda 162 adam jumys isteıdi.

Aımaq basshysy jarty myńnan astam adam kásibı bilim alyp jatqan Beıneý polıtehnıkalyq kolledjinde de boldy. Keshen 5 ǵımarattan turady. Kolledj praktıkalyq sabaqtarǵa arnalǵan zamanaýı jabdyqtarmen, smart-synyptarmen, ınteraktıvti taqtalarmen jabdyqtalǵan. Robototehnıka, tehnıkalyq modeldeý, tehnologııa jáne beıneleý kabınetteri bar.