Qańtarda kókenister men sharýashylyq zattar aıtarlyqtaı qymbattap, turmystyq tehnıka arzandaǵan

Ulttyq statıstıka bıýrosy qańtardaǵy ınflıasııa deńgeıi týraly aqparat jarııalady. Bıýro málimetinshe, ótken aıda azyq-túlik taýarlary – 1,4%, azyq-túlikke jatpaıtyn taýarlar – 0,9%, aqyly qyzmetter 0,7% ósken.

Azyq-túlik taýarlary arasynda kókónis baǵasy aıtarlyqtaı qymbattaǵan, qııar – 22,4%, pııaz – 16,7%, qyzanaq – 8,8%, tátti burysh baǵasy 6,5% ósken. Sondaı-aq kúrish 2,9%, untaq jarmasy, balyq, qara bıdaı nany, jumyrtqa, suly jarmasy, aıran, taýyqtyń tós eti, sút, tuzdy irimshik, jemister, aýyz sý 2 paıyzǵa jýyq qymbataǵan. Qant  kerisinshe sol mánge jýyq arzandaǵan.

Azyq-túlikke jatpaıtyn taýarlardyń ishinde qańtarda baǵanyń eń kóp ósýi jýý jáne tazalaý quraldaryna baıqaldy. Máselen, ótken aımen salystyrǵanda kir jýǵysh untaq – 3,9%, aǵartqyshtar – 3,5%, ydys jýýǵa arnalǵan quraldar – 3%, kir sabyn 2,7% ósti. Turmystyq tehnıka baǵasy, kerisinshe, tústi, máselen, shańsorǵysh –  1,6%, qysqa tolqyndy pesh – 1,3%, as úı plıtasy 1,1% arzandady.

О́tken aıda aqyly qyzmetterdiń baǵasy 0,7% ósti. Baǵalardyń ósýi notarıýs qyzmetterine – 12,6%, kúndizgi stasıonarda emdelý – 5,2%, jerleý boıynsha rıtýaldy qyzmetke – 4,7%, stomatologııalyq qyzmetterge 2,5% baıqaldy. Kommýnaldyq qyzmetter boıynsha qoqys shyǵarý tarıfteri – 2,8%, turǵyn úıdi kútip ustaýǵa jumsalǵan tólem – 1%, ortalyqtan jylytý 0,8% ósti, al tarıftiń tómendeýi – sý burý qyzmetine baıqaldy – 0,2%.

О́ńirler arasynda eń joǵary aılyq ınflıasııa Aqtóbe oblysynda – 1,7% (ortasha respýblıkalyq deńgeıden 0,6 p.t. joǵary), eń tómengi – 0,7% Almaty oblysynda tirkeldi.