Arnaıy avtorlyq baǵdarlama arqyly bilim berý ortalyǵy búginge deıin 2 myńnan asa adamdy oqytypty. Bul qatarda kúndelikti qoldanys úshin til úırenemin degenderden bólek, akademııalyq sóıleýdi meńgerý úshin keletin jan kóbeıgen.
Ortalyqta qazaq tilimen birge qazaq mádenıetin dástúrli túrde tereńdetip oqytady.
«Basynda qazaq tilin jaqsy bilmeıtinmin. Eki aıdyń ishinde ózgeris bar. Dostarymmen qazaq tilinde sóılese bastadyq. Olar da úırenip qaldy», – dedi bilim alýshy Sáken Qurǵanbaev.
Ortalyq qazaq tilin úıretýge negizdelgen. Degenmen, orys jáne aǵylshyn tili kýrsy da bar. Bilim alýshylar jeke oqıdy. Al, toptyq quram kóbine praktıkalyq tapsyrmalardy oryndaıdy. Aıta ketý kerek, memlekettik tildi úırenýge qyzyǵýshylyq tanytatyndardyń ishinde shetel azamaty kóp.
«Qazaq tilin úırenýge nıet tanytqandardyń basym bóligi – orys ulty. Basqa ult ókilderi de bar. Kárister oqıdy, Berlınnen kelgen stýdent qyzymyz, Amerıkadan ulymyz bar. Sondyqtan ártúrli ult ókili oqıdy dep aıtsaq bolady», – dedi Bilim berý ortalyǵynyń oqytýshysy Aısha Ábdirahmanqyzy.
«Bilim berý ortalyǵynyń negizigi maqsaty – qazaq tilin damytý. Memlekettiń saıasatyna, Prezıdenttiń halyqqa Joldaýyna saı qazaq tilin damytý úshin ashtyq. Sondaı-aq orys tili, aǵylshyn tili qosymsha oqytylady», – dedi bilim berý ortalyǵynyń dırektory Muqııat Qaǵbat.
Pikir qaldyrý
pikir