Shymkentte oq jáne stend atýdan halyqaralyq týrnır bastaldy

Táýelsizdiktiń 30 jyldyǵy qarsańynda Shymkentte Gran-prı KSRO sport sheberi Vladımır Pochıvalovty eske alýǵa arnalǵan oq jáne stend atýdan XXX Halyqaralyq týrnır bastaldy. Bul týraly qalalyq dene shynyqtyrý jáne sport basqarmasy málimdedi. Jarys 2021 jyldyń 25-31 qazan aralyǵynda «Shymkent Shooting Plaza» atqyshtar kesheninde ótýde.

Jarystyń maqsaty-elimizdegi atý sportyn damytý, sportshylardyń biliktiligin arttyrý jáne olardyń reıtıngin anyqtaý, olardy respýblıkalyq jáne halyqaralyq jarystarǵa daıyndaý, jattyqtyrýshylar men tóreshilerdiń kásibı biliktiligin arttyrý.

Stend atý boıynsha halyqaralyq týrnır "SHYMKENT SHOOTING PLAZA" ashyq atý alańynda ótedi, al oq atý boıynsha jarystar Shymkent qalalyq joǵary sport sheberligi mektebiniń atys tıri bazasynda ótedi. Týrnır el Táýelsizdiginiń 30 jylyna sáıkes otyzynshy ret ótkizilip otyr. 2018 jyldan bastap bul týrnır ISSF halyqaralyq atý federasııasynyń sporttyq is-sharalar kúntizbesine engizildi.

Jarysqa 5 elden – Belarýs, Qyrǵyzstan, Reseı Federasııasy, О́zbekstan jáne Qazaqstannyń barlyq óńirlerinen sportshylar qatysady.

Sondaı-aq, týrnır barysynda Olımpıada jáne Azııa oıyndarynyń, Azııa chempıonattarynyń chempıondary men júldegerleri, Álem kýboktarynyń júldegerleri óz sheberlikterin kórsetedi.

Aıta ketý kerek, Shymkentke kelgen barlyq sportshylar, jattyqtyrýshylar men tóreshiler PTR-testileýdiń teris nátıjeleri bar anyqtamalardy usyndy. Sonymen qatar, týrnır ótetin sport nysandarynda barlyq sanıtarlyq normalar saqtalady.