Nurlan Nyǵmatýlın jýrnalısterge arnalǵan "Parlament sózi" syılyǵynyń laýreattaryn marapattady

Májilis jýrnalısterge arnalǵan "Parlament sózi" syılyǵynyń qorytyndysyn jarııalap, arnaýly atalymdar boıynsha jeńimpazdardy anyqtady.

Quramynda májilis depýtattary, kórnekti qoǵam qaıratkerleri, partııa ókilderi kiretin komıssııa sheshimi boıynsha osy jyly jeńimpazdar segiz atalym boıynsha saıysqa túsken. Bıyl parlamenttik syılyq besinshi ret ótkizilip otyr.

Májilis tóraǵasy Nurlan Nyǵmatýlın "Parlament sózi" syılyǵynyń jeńimpazdaryna, sondaı-aq barsha buqaralyq aqparat ókilderine kásibı merekege oraı quttyqtaý lebizin jetkizdi. 

Nurlan Nyǵmatýlın quttyqtaý sózinde aqparattyń kez kelgen salasynda, gazette, teledıdarda, ınternet baspalarda jumys isteıtin tilshilerge qurmet bildirdi.

– Biz osy jyly da Elbasymyz Nursultan Ábishuly Nazarbaevtyń tapsyrmalaryn, memleket basshysy Qasym-Jomart Kemeluly Toqaevtyń mańyzdy bastamalaryn júzege asyrý jolynda birlesip, ashyq, sapaly jumys jasap kelemiz dep aıtýǵa bolady.  Qasıetti Otanymyz – Qazaqstanymyzdyń táýelsizdik alǵanyna 30 jyl tolady. Osy ýaqytta ótken barlyq saıası, áleýmettik, ekonomıkalyq ózgerister, sonyń ishinde, parlamenttiń zań shyǵarý qyzmeti árqashanda, tikeleı aqparat quraldarynyń nazarynda boldy. Sondyqtan, jýrnalıster árqashanda táýelsizdikpen birge jasap, egemen elimizdiń árbir jeńisin, árbir jemisin nasıhattap, elimizdiń, halqymyzdyń ómir sapasyn odan ári arttyrýǵa zor úles qosyp kele jatyr, – dedi Nurlan Nyǵmatýlın.

Is-sharada "Parlamenttik jýrnalıstıkany damytýǵa qosqan úlesi úshin" nomınasııasy Qýanysh Sultanov jáne Jumabıke Júnisovaǵa tabystaldy. 

Al "Úzdik televızııalyq sıýjet úshin" nomınasııasyn "Qazaqstan" telearnasynyń tilshisi Nysanaly Yǵylov, "Habar" telearnasynyń tilshisi Dınara Janbatyrova ıelendi. 

"Úzdik baspa jarııalanymy úshin" nomınasııasy "Aıqyn" gazetinen Gúlzına Bektasovaǵa, "Kazahstanskaıa pravda" gazetinen Vladımır Kýrıatovke tabystaldy. 

"Úzdik ınternet jáne radıo materıaly úshin" nomınasııasy "Qamshy.kz" aqparat portalyna jáne "Sputnik.kz" saıtyna berildi.  

"Arnaıy reportaj" nomınasııasyn "Habar 24" arnasynan Nurshapaǵat Nesipbaevqa jáne "Pervyı kanal "Evrazııa arnasynyń "Parlament online" baǵdarlamasyna usynyldy. 

"Úzdik beıne-sýret materıaly úshin" nomınasııasyn "Astana" telearnasynan Nurjan Mahmýtov jáne "Tengrinews" ınternet resýrsynan Turar Qazanǵapov jeńip aldy.  

"Áleýmettik jelidegi úzdik materıal úshin" nomınasııasy Murat Ábenovke jáne Danııar Áshimbaevqa berildi. 

"Qazaqstan Respýblıkasy Táýelsizdiginiń 30 jyldyǵyna arnalǵan" arnaıy nomınasııasy "Egemen Qazaqstan" respýblıkalyq gazetiniń basqarma tóraǵasy Qydyráli Darhan Qýandyqulyna jáne "KTK" telearnasyna berildi. 

Májilis syılyq ıegerlerin májilis sımvolıkasy beınelengen músinshelermen jáne arnaıy dıplomdarmen marapattady.