Ulttyq bank ıpotekalyq baǵdarlamalardyń jabylatynyna túsinik berdi

Qazaqstannyń Ulttyq Banki "7-20-25" jáne "Baspana hıt" ıpotekalyq turǵyn úı baǵdarlamalarynyń jabylatynyna baılanysty málimdeme jasady.

"7-20-25" baǵdarlamasy boıynsha 20% bastapqy jarna sala otyryp, jylyna 7% jeńildetilgen mólsherlememen 25 jylǵa birinshi naryqtan baspana ala alýǵa bolady. Jobany júzege asyrýǵa 1 trln teńge bólingen. Joba iske qosylǵan alǵashqy jyly 3 289 nesıe berilgen (39,4 mlrd teńge), al 2019 jyly – 8 723 nesıe (99,1 mlrd teńge), 2020 jyly – 10 207 nesıe (120,8  mlrd teńge) rásimdelgen. Al, osy jyldyń bes aıy aralyǵynda (qańtar-mamyr) qazaqstandyqtar 73,9 mlrd teńgege 5 656 nesıe alǵan. Jalpy alǵanda, osy ýaqytqa deıin baǵdarlama boıynsha 333,3 mlrd teńge ıgerildi.

"Halyqtyń joǵary suranysy men ıpotekalyq nesıeniń qarqynyna qarap, biz «7-20-25» baǵdarlamasy 2022 jyldyń sońyna deıin, ıaǵnı bólingen lımıt taýsylǵan soń aıaqtalady dep boljap otyrmyz" dep habarlady ulttyq bank.

2018 jyly 10,75% mólsherleme boıynsha "Baspana hıt" naryqtyq ıpotekalyq baǵdarlamasy iske qosylǵan bolatyn. Bul baǵyt boıynsha baspanasy bar bolsa da, azamattar  alǵashqy naryqtan da, qaıtalama naryqtan da úı ala alady. Qaryz merzimi 15 jylǵa deıin, maksımaldyq somasy 35 mln teńgeni quraıdy.

"Baspana hıt" baǵdarlamasyn júzege asyrý úshin 600 mlrd teńge bólingen, sonyń ishinde 520,8 mlrd teńgeni quraıtyn 56 752 qaryz berilgen. Alaıda, baǵdarlama "aınalmaly" tetik arqyly, ıaǵnı, qarjylandyrýdyń ortaq somasy aldynda jabylǵan qaryz esebinen kóbeıetinin eskere kele, biz nesıelendirýdiń jalpy kólemi 675 mlrd teńge bolady dep boljap otyrmyz. Qarjynyń belsendi túrde ıgerilip jatqan eskere otyra, "Baspana hıt" ıpotekalyq jobasy 2021 jyly aıaqtalady degen boljam bar" dep málimdegen ulttyq bank atalǵan baǵdarlamalardyń jabylatyny ıpotekalyq nesıelendirýdiń qoljetimdiligine áser etpeıdi dep topshylaıdy.