"Orynbordy qazaqqa syılasyn". Jastar SQO ákimine talap qoıdy

"Namys" jastar qozǵalysynyń músheleri Soltústik Qazaqstan oblysynyń ákimi Qumar Aqsaqalovqa petısııa tapsyrdy. Petropavlǵa barǵan belsendiler SQO ortalyǵyna baıyrǵy Qyzyljar ataýyn qaıtarýdy talap etken. Sonymen qatar jastar orys saıasatkerlerin ornyna qoıý  "bılik tizginindegi" azamattardyń mindeti ekenin aıtqan. 

Jaqynda Reseı dýmasynyń depýtaty jáne "Bolshaıa ıgra" baǵdarlamasynyń júrgizýshisi Vıacheslav Nıkonov "Pervyı kanal" memlekettik telearnasynyń efırinde "Qazaqstan aýmaǵy – Reseı tarapynan jasalǵan syı" dep málimdeme jasaǵan. Qazaqstan syrtqy ister mınıstrligi depýtatqa jaýap berse de, mundaı saryndaǵy málimdemelerdiń aıtylýy toqtamady. Soǵan baılanysty "Namys" jastar qozǵalysyndaǵy belsendi top ózderiniń paraqshasyna jarııalaǵan vıdeoda atalmysh máseleni de kóterdi.

–  О́zderińizge málim, kórshiles Reseıdiń keıbir saıqymazaq saıasatkerleri Qazaqtyń qanmen kelgen jerin syılyq dep ózderin «jomart» qylyp kórsetip júr. O zaman da bu zaman, topyraqqa talasyp shyr-pyr bolǵan adamzat balasy bir qarys jer úshin qandas qanyn tókkeni tarıhtan belgili. Eger, Reseı shynymen de jomart bolsa, dáleldesin. Qaramaǵyndaǵy talaı ultty Qyrymdy Ýkraınaǵa, Orynbordy Qazaqqa qaıtarsyn!

Al, Petropavl, Pavlodarǵa kelsek, Sháken Aımanov, Qanysh Sátpaev, Sultanmahmut Toraıǵyrov, Júsipbek Aımaýytov, Álkeı Marǵulan, Sábıt Muqanov, Maǵjan Jumabaev syndy neshe túrli alyptardy ómirge ákelip, qanat bitirgen ólkeni Qazaqqa Qudaı syıǵa tartqan. Táýelsizdik alǵan 30 jyl ishinde memlekettik mańyzy bar qala ataýyn qazaqshalaı almaý qazaqtyǵymyzǵa syn. Bul jer qashannan bizdiń jer!

El basynda, bılik tizgininde otyrǵan aǵalar kelesi júris sizderde. Sala qulash tili bar, sózden qaıtpas túri bar orys saıasatkerlerin ornyna qoıý sizderdiń ata-babalar aldyndaǵy mindetińiz, bolashaq býyn aldyndaǵy boryshyńyz.

Búgin máseleni sheshe almasaq, bolashaq aldynda uıattymyz. Keler urpaq jarty ǵasyr osyny aıtpaı, ózgertpeı ne istedińizder dese, ne betimizdi aıtamyz?! Osyny elge estirtý úshin búgin Almatydan Maǵjan atamyz týǵan ólkege arnaıy keldik. Otyz eldiń qataryna kirý aldynda turǵan Táýelsiz elge qala ataýyn aýystyrý úshin 30 jyl qajet emes. Taǵy qansha jyl kútýge bolady?!, – dellingen jastardyń úndeýinde.