Myńjylqy Berdiqojaev: Karantın rejımin engizgen durys

Neırohırýrg dáriger Myńjylqy Berdiqojaev jazda koronavırýs ınfeksııasynyń jeńil túrimen aýyrǵan naýqastar jeltoqsanda qaıtadan syrqattanýy múmkin ekenin aıtty.

– Sheneýnikter esep berýi barysynda koronavırýstyń ekinshi tolqynyna daıyn ekenin aıtýda. Biraq ekinshi tolqynǵa júz paıyz daıyn bolý múmkin emes. Jaz, kóktem aılaryndaǵy jaǵdaıǵa qaraǵanda qazir áldeqaıda daıynyraqpyz. Eger elde adamdar taǵy da jappaı vırýs juqtyryp, aýyratyn bolsa, qaıtadan halyq ottegi izdep ketetindeı jaǵdaı týyndaýy múmkin. Sondyqtan úkimettiń daıynbyz deýi – adamdarǵa "jalǵan" senim, úmit berý. Osydan abaı bolǵanymyz durys, – deıdi dáriger. 

Ol qazirgi ýaqytta qajetti sharalar qabyldanyp, karantın talaptarynyń kúsheıtilip jatqanyn atap ótti.

– Qazir elde tótenshe jaǵdaı rejımin engizý erterek. Biraq lokdaýyndaǵydaı sál jeńilirek, karantın rejımin engizgen durys. Onyń barlyǵy qazir engizilip jatyr. Biraq lokdaýnnyń keri áseri adamdar qarajat jaǵynan qamtylmaı, qınalyp qalýynda. Fransııanyń tájirıbesin alyp qaraıtyn bolsaq, qıyn jaǵdaıdan karantınsiz shyǵa almaıtyn sııaqtymyz. Sondyqtan osy eldiń tájirıbesin eskere otyryp, karantın sharalaryn engizgen durys, – dedi ol.

Onyń sózinshe, vırýs juqtyryp, aýyryp shyqqan adamdardyń qaıtadan aýyrý qaýpi bar.

– Kóktemde, jazda aýyryp shyqqan adamdardyń ishinde jeńil túrimen aýyrǵandar kúzdegi tolqynda qaıtadan aýyrýy múmkin. Biraq munyń qanshylyqty yqtımal ekenin naqty eshkim aıta almaıdy. Ony ýaqyty kelgende bilemiz. Qazirgi mınıstrliktiń málimdep otyrǵan statıstıkasyn aıtý qıyn. Úkimet karantındi kúsheıtkenine qaraǵanda ekinshi tolqyn bastalyp kele jatyr. Sonymen qatar, olar KVI- derekterin keshiktirip berýi de múmkin. Synamalardyń keshiktirilip berilýi resmı statıstıkaǵa áser etedi. Biraq naýqastar sanynyń kóbeıip kele jatqany qazirden-aq kórinip tur, – dep sózin túıindedi Myńjylqy Berdiqojaev.