«ALǴYSYMYZ ShEKSIZ»: QALA KÚNINDE 150-GE JÝYQ OTBASY ÚILI BOLDY

​Búgin jasyl jelekke oranyp, totydaı túrlengen Taldyqorǵanda «Qala kúni» merekesi toılandy. Jetisýdyń júregine aınalǵan shahardyń merekesine oraı 150-ge jýyq otbasy úıli boldy.

​ Áýeli Taldyqorǵan qalasynyń ákimi Ǵalymjan Ábdiraıymov kotedjdi qalashyqqa, «Kóktem» shaǵyn aýdandaryna baryp, áleýmettik az qamtylǵan otbasylarǵa, jalǵyzbasty, kópbalaly analarǵa, jetim balalar, I-II toptaǵy múmkindigi shekteýli jandarǵa páter kiltin tabystap, izgi tilegin bildirdi.

– Búgin taldyqorǵandyqtar úshin – qos mereke. Qala kúni merekesimen qatar búgin 131 otbasy úıli bolyp, qýanyshqa kenelýde. Atap aıtsaq, jańa ǵana kottedjdi qalashyqta 71 azamat jańa úıdiń kiltin alsa, osy jerde 60 otbasy baspanaly bolǵaly tur. «Týǵan úıdiń tútini de jyly» degen sóz bar. Osy shańyraq sizderge qut-bereke ákelsin, jańa úıde ósip-óne berińizder! Mundaı qýanyshtarǵa qol jetkizý – oblys ortalyǵy Taldyqorǵan qalasynyń kúnnen kúnge damyp, órkendep kele jatqanynyń kýási. Sońǵy jyldarda qalada 6-shy, 7-shi, 8-shi shaǵyn aýdandar, kottedjdi qalashyq boı kóterip, turǵyn úıge muqtaj otbasylar baspanaly bolýda. Bul jumystar memlekettik baǵdarlamalardyń tıimdi iske asyrylýynyń nátıjesinde, eń aldymen  Elbasymyzdyń, Prezıdentimizdiń tikeleı qoldaýynyń arqasynda júzege asty. Halyqtyń ál-aýqatyn arttyrý, qoljetimdi baspanamen qamtý týraly tapsyrmalarynyń aıasynda oryndaldy. Jalpy qalashyqta barlyǵy 620 turǵyn úı beriletin bolady. Qazirgi tańda sonyń 200-den astamy berilip úlgerdi. Endi oblys basshysy Amandyq Batalovtyń arnaıy tapsyrmasymen jeltoqsan aıynda taǵy 48 kottedjdi qoldanysqa breý josparymyzda bar, — dedi Ǵalymjan Raıyluly.

Mereke qarsańynda baspana baqyty buıyryp, úıli bolǵan jandar sheksiz rızashylyǵyn bildirip, aqjarma tilekterin aqtardy.

​Atalmysh shara «Saltanat saraıynda» jalǵasyn tapty. Basqosýda Almaty oblysynyń ákimi Amandyq Batalov jurtshylyqty merekelerimen quttyqtady.

– Taldyqorǵan qalasynyń tól merekesi, qala kúni ózderińizben júzdesip, arnaıy quttyqtap, merekeni saltanatty jaǵdaıda ótkizýdi jón kórdik.  Búgingi merekeni qalalyqtar erekshe qýanyshpen atap ótýde. Jańa ǵana biz 131 otbasyǵa jańa turǵyn úılerdiń kiltterin tabys ettik. Sol kóterińki kóńil kúı osy jerde jalǵasyn taýyp, sizdermen júzdesip otyrmyz.

Bıylǵy jyl birshama qıyndyqtar týǵyzǵanymen, jalpy Almaty oblysynyń, sonyń ishinde Taldyqorǵan  qalasynyń ósip-órkendeýinde turaqtylyqty saqtaı aldyq. ​Elbasynyń tapsyrmalaryna, Memleket basshysynyń aldymyzǵa qoıǵan mindetterine sáıkes aýyl sharýashylyǵynda, qurylys salasynda jumystar qarqyndy júrdi. Memlekettik baǵdarlamalardyń aıasynda atqarylǵan jumystar óz nátıjesin kórsetip, halyqtyń turmysyn jaqsartýǵa zor yqpal etti, – deı kele óńir jetistigine toqtaldy.Sondaı-aq, elimizdi indet jaılaǵan kezde kún-tún demeı qymet etken aq halatty abzal jandarǵa 16 páter kiltin tabystaldy.

Jıyn barysynda Taldyqorǵan qalasynyń ákimi Ǵalymjan Ábdiraıymov jurtshylyqty merekemen quttyqtap, shahardyń damýy men órkendeýi jolyna úlesin qosqan zııaly jandarǵa «Taldyqorǵan qalasynyń Qurmetti azamaty» ataǵyn tabys etti. Atap aıtsaq, Almaty oblysy jáne Qazaqstan Respýblıkasynyń  sport salasynda Eńbegi sińgen azamat Rahymbek Tólendinov, Bıken Rımova  atyndaǵy Taldyqorǵan drama teatrynyń ártisi Máken Nurmuhambetova, Taldyqorǵan obaǵa qarsy kúres stansııasy dırektorynyń orynbasary Valerıı Sapojnıkov, zeınetker Habdýlla  Ibraıymhanov, "JLC sút" JShS-nyń dırektory Olga Bogdanova «Taldyqorǵan qalasynyń Qurmetti azamaty» tósbelgisin taqty.

Sonymen qatar, qala kúni merekesi aıasynda ótken «Jasa, jaına – Taldyqorǵan», «Arý qala – Taldyqorǵan»  syndy túrli chelendjderde úzdik shyqqan jandarǵa birqatar atalym boıynsha marapat tabys etildi.