Qazaqstannyń bir qalasy karantınge jabyldy

Soltústik Qazaqstan oblysy Maǵjan Jumabaev aýdany ortalyǵy Býlaev qalasy búginnen bastap karantınge jabyldy, dep habarlady QazAqparat saıty.

Saıt málimetinshe, karantınniń jarııalanýyna koronavırýs ınfeksııasyn juqtyrǵandardyń artýy sebep boldy. 

Oblystyq bas sanıtarııa dárigeri Serikbaı Qasmaqasovtyń jańa qaýlysymen búgin, 9 qazannan bastap M.Jumabaev aýdanynyń ortalyǵy Býlaev qalasyna karantın shekteýleri engizildi.

Qaýlyǵa sáıkes resmı jáne jekemenshik jolaýshy tasymaldaýshylarǵa Býlaev qalasynan basqa eldi mekenderge jáne oblys ortalyǵyna jolaýshy tasymaldaýǵa tyıym salyndy.

Qala turǵyndaryna da birneshe shekteý qoıyldy, ıaǵnı budan bylaı:

1) saǵat 22:00 men 6:00 aralyǵynda úılerinen shyqpaýy kerek, olar tek jumysqa jáne medısına mekemesine barýǵa, jaqyn mańdaǵy dúkenge, dárihanaǵa, qoqys shyǵarýǵa ǵana shyǵa alady;

2) kórshileriniń, týǵan-týystarynyń, dos-tanystarynyń úıine barýǵa tyıym salyndy;

3) keshki saǵat 19:00-den keıin balalarǵa eresektersiz kóshege shyǵýǵa shekteý qoıyldy;

4) 65 jastan asqandar óz-ózin oqshaýlaý rejımin ustanýy tıis;

5) respırator ınfeksııasynyń belgileri paıda bolǵan jaǵdaıda birden 103 nómiri arqyly úıge dáriger shaqyrtý qajet;

6) jerleý rásimine 30 adamnan asyrmaı, tek týǵan-týystary ǵana qatysa alady.

Býlaev qalasynda memlekettik organdar, ákimdikter, quqyq qorǵaý organdary, medısına mekemeleri, qoǵamdyq tamaqtaný nysandary, BAQ, jerleý rásimderi qyzmeti, azyq-túlik, qurylys materıaldary, avto jáne aýyl sharýashylyǵy tehnıkasynyń qosalqy bólshekterin satatyn saýda oryndarynan basqa barlyq kásiporyndar men uıymdar jumysyn toqtatty. Aýmaǵy 500 sharshy metrden aspaıtyn dúkender qalypty rejımde, al aýmaǵy odan úlken saýda oryndary saǵat 9:00-den 16:00-ge deıin ǵana jumys isteıdi.

Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti baspasóz qyzmetiniń málimetinshe, Býlaev qalasyn jabýǵa koronavırýs ınfeksııasyn juqtyrǵandardyń artýy sebep bolǵan. Býlaev qalasynda 1 qazannan bastap 15 naýqas tirkelse, aýdan boıynsha olardyń sany – 24.

– Vedomstvoaralyq komıssııanyń sheshimine sáıkes, oblys aýdandarynda 14 kúnniń ishinde aýyrǵandar sany 7 adamnan asatyn bolsa, eldi mekenge karantın shekteýleri engiziledi. Al shaǵyn aýyldarda bul ereje koronavırýsty juqtyrǵandar sany 3-5 adamnan assa qoldanylady, – deıdi sanıtarııa dárigerleri.