Elordaǵa qos birdeı mýzykalyq teatr nege kerek boldy?

Jaqynda elordada qos teatrǵa jańa dırektor taǵaıyndalǵany týraly aqparat tarady. Qalıbek Qýanyshbaev atyndaǵy Qazaq memlekettik akademııalyq mýzykalyq drama teatrynyń basshylyǵyna Ernar Jumataev kelse, jańadan ashylǵaly jatqan Memlekettik mýzykalyq balalar men jasóspirimder teatryna Ashat Maemırov dırektor atandy. Alaıda sońǵysy eldegi epıdemıologııalyq jaǵdaıǵa baılanysty resmı túrde qashan ashylatyny ázirge belgisiz. Pandemııa jaǵdaıynda bıýdjet esebinen bir qalada baǵyty mazmundas eki teatrdy ustaý qanshalyqty qajet? Qamshy tilshisi Nur-Sultan qalasynyń ákimdiginen máselege qatysty jaýap alýǵa tyrysty.

Qala ákimdigi jańa teatrdy ashýǵa elordalyq ata-analardyń balalarǵa arnalǵan teatr ashý týraly usynysy muryndyq bolǵanyn málimdedi. Mádenıet oshaǵynda ónerge qabiletti jas daryndy mektep oqýshylar men múmkindigi shekteýli balalar óz shyǵarmashylyǵyn shyńdaıtyn kórinedi.

Ákimdik jaýabynda bul maqsatqa bıýdjetten eshqandaı qarjy jumsalmaıtyny habarlanǵan.

"Elordada qala bıýdjetinen shyǵyn shyǵarylyp jańa teatr ashylǵan joq. Bul – basy ashyq nárse. Osyǵan deıin Nur-Sultan qalasynyń ákimdigine qaraǵan Q.Qýanyshbaev atyndaǵy Qazaq memlekettik akademııalyq mýzykalyq drama teatry jańa ǵımaratqa kóshýine jáne respýblıkalyq bıýdjet arqyly qarjylandyrylýyna baılanysty QR mádenıet jáne sport mınıstrliginiń basqarýyna beriledi. Al Q.Qýanyshbaev teatrynyń bosaǵan burynǵy ǵımaratynda – bıýdjetten eshqandaı shyǵyn shyǵarylmaı elordalyq jas urpaqtyń boıyna rýhanı-estetıkalyq qundylyqtardy darytý úshin mýzykalyq jas kórermender ujymy jumysyn jalǵastyrady", – delingen ákimdik tarapynan berilgen jaýapta.

Q.Qýanyshbaev teatry 1 qazannan bastap jańa ǵımaratqa kóshetinin mekemeniń jańa dırektory Ernar Jumataev rastady.

– Bul teatr – astananyń ystyǵyna da, sýyǵyna da kóngen teatr. Munda kelgenime 2 kún ǵana boldy. Qaı jerge barsam da qazaq ónerine qyzmet etemin ǵoı. Meniń qazirgi basty mıssııam – ujymdy aman-esen jańa ǵımaratqa kóshirý, – dedi ol. 

Endi ashylatyn balalar men jasóspirimder teatryna qyrkúıek aıynyń 29-30-y kúnderi kastıng arqyly akterler iriktelmek. Keıin birtindep ákimshilikten bastap, teatrdaǵy ózge de bólimder anyqtalady.

Ashat Maemırov issaparda júr degen onyń jeke kómekshisi Ádilǵazy Kereev eldegi epıdemıologııalyq  ahýalǵa baılanysty jańa teatrdyń resmı ashylýy qashan bolatyny ázirge belgisiz ekenin habarlady.

Teatr basshylaryn taǵaıyndaý týraly resmı qaýly áli shyqpaǵan. Qamshy tilshisi Nur-Sultan qalasynyń Mádenıet basqarmasyna habarlasyp, máselege baılanysty túsinik berýin suraǵanynda tutqanyń arǵy jaǵyndaǵy qyzmetker "eshqandaı artyq aqparat bere almaımyz" dep jaýap berdi.