Máýlen Áshimbaev: Senat elimizdiń barlyq óńiriniń parlamenttegi ókildigin qamtamasyz etedi

Senat tóraǵasy Máýlen Áshimbaev búgin senat depýtattarynyń saılaýy ótip jatqanyn aıtyp, qoldanystaǵy zańnamaǵa sáıkes ár oblystan, astanadan jáne respýblıkalyq mańyzy bar qalalardan bir-birden saılanatyn 17 senatordy tańdaýshylar-máslıhat depýtattary saılaıtynyn atap ótti. Bul jóninde ol facebook-tegi paraqshasyna jazdy.

Jazbada joǵarǵy palata quramynyń bir bóligi úsh jyl saıyn jańartylyp otyratyny, senatta qoǵamnyń ulttyq-mádenı jáne ózge de eleýli múddeleriniń bildirilýin qamtamasyz etý qajettiligi eskerilip, palatanyń 15 depýtatyn memleket basshysy taǵaıyndaıtyny jazylǵan.

"Zań shyǵarýshy bılik júıesine sáıkes senat elimizdiń barlyq óńiriniń parlamenttegi ókildigin, májilis quramy jańarǵan kezde zańnamalyq saıasattyń sabaqtastyǵyn jáne zań jobalarynyń sapaly qaralýyn qamtamasyz etedi. Májilis depýtattarynyń partııalyq tizimder boıynsha jáne Qazaqstan halqy Assambleıasynan saılanatynyń eskersek, senatta óńirler múddeleriniń bildirilýi asa mańyzdy" dedi Máýlen Áshimbaev.

Senat tóraǵasy zań shyǵarýshy bılikti uıymdastyrýdyń qazirgi júıesi qabyldanǵan zańdardy sapaly pysyqtaýdy qamtamasyz etetinin tilge tıek etken.

"Qaralatyn másele jan-jaqty ári tereń zerttelip, zań qabyldaý jumystary kezeń-kezeńmen jáne qısyndy júrgizilýge tıis. Atalǵan jumystyń sapasy memlekettik organdardyń normalaryna, ıaǵnı, tutas eldiń tynys-tirshiligine yqpal etedi. Ár qabyldanǵan zańnyń ondaǵan myń otbasy men naqty adamdardyń tynys-tirshiligine tikeleı áseri bar. Osy rette parlament palatalarynyń jumysy zań shyǵarý úderisiniń barynsha tıimdi ári teńgerimdi bolýyna múmkindik beredi jáne zańdardy eldiń, sondaı-aq ár azamattyń múddesin eskerip qabyldaýdy qamtamasyz etedi" delingen jazbada.

Odan bólek, jazbada qabyldanatyn zańdar Qazaqstan prezıdentiniń bastamalaryn zańnamalyq turǵydan qamtamasyz etýge tıis ekeni de aıtylǵan.

"Damýdyń jańa kezeńinde memleket basshysy usynǵan halyqtyń turmys sapasyn arttyrýǵa jáne ınklıýzıvti ekonomıkalyq ósýge arnalǵan jańǵyrtý baǵdaryn zańnamalyq turǵydan qamtamasyz etýdiń mańyzy zor. Bul rette depýtattardyń róli erekshe. Koronavırýs pandemııasymen jáne onyń saldarymen kúresý úshin quqyqtyq bazany jetildirý de mańyzdy mindetterdiń biri bolyp qala beredi. Búgin saılanǵan senatorlar tıisti ókilettikterin alǵan sátten bastap atalǵan strategııalyq mindetterdi oryndaýǵa óz úlesterin qosyp, belsendi jumys isteıdi dep senemin" dedi senat tóraǵasy.