Almaty qalalyq balalar juqpaly aýrýlar aýrýhanasy 125 ottegi konsentratorymen qamtamasyz etiletin bolady

Almaty qalalyq balalar juqpaly aýrýlar aýrýhanasy 125 ottegi konsentratorymen qamtamasyz etiletin bolady. Bul týraly Almaty qalalyq balalar juqpaly aýrýlary aýrýhanasynyń bas dárigeri Erjan Seralın Almaty qalasynyń óńirlik kommýnıkasııa qyzmetiniń alańynda ótken onlaın-suhbat barysynda aıtty.

Almaty qalasy ákimdigi 240 oryndyq qalalyq balalar klınıkalyq juqpaly aýrýlar aýrýhanasyn 125 ottegi konsentratorymen qamtamasyz etetin boldy.

«Qazirgi ýaqytta bizde 25 konsentrant bar, onyń 17-si 8 lıtrden. (Ol eki adamǵa jetkilikti). Apparattar jetkilikti, naýqastar tolyq qamtamasyz etilgen. Qala ákimdigimen birlesken jumystyń arqasynda kelesi aıda bizge 125 ottegi konsentratory beriledi. Sondaı-aq, bizdiń aýrýhananyń barlyq tósek oryndaryn qamtıtyn eki ottegi qondyrǵysyn ornatý josparlanýda», — dedi E. Seralın.

Aýrýhananyń jansaqtaý bólimi 12 orynǵa eseptelgen. Bas dáriger onyń barlyǵy ókpeni jasandy tynys aldyrý apparattarymen jabdyqtalǵandyǵyn atap ótti.

«12 tósekke arnalǵan 12 jasandy tynys aldyrý apparaty bar. Aldaǵy ýaqytta taǵy 6 qurylǵy satyp alý josparlanýda. Sonymen qatar, respıratorlyq qoldaýdy qajet etetin naýqastar úshin ár palatada ottegi pýnktteri bar, oǵan qosymsha ottegi mobıldi mashınalaryn qoldanamyz», — dep tolyqtyrdy E. Seralın.