Baqytjan Saǵyntaev: Meni jastardyń beıqamdyǵy alańdatady

Almaty ákimi Baqytjan Saǵyntaev jastardy karantın rejımin saqtaýǵa shaqyrdy. Bul týraly qala ákimi Facebook-tegi paraqshasynda jazdy.

Ákimniń aıtýynsha, qazir qalada eki aptalyq karantın jalǵasýda. «Jalpy Almaty epıdemııaǵa qarsy tura alýda. Medısınalyq qyzmettiń jumysy qaýyrt. Dese de, bosańsýǵa bolmaıdy. Infeksııany eńserip, qalanyń qalypty tirshiligin qalpyna keltirý úshin kóp nárse isteý kerek.

Qala turǵyndary sanıtarlyq normalardy saqtap, indetpen kúresýge shyndap kiriskeni qýantady. Áleýmettanýshylardyń málimeti boıynsha kóptegen almatylyqtar KVI-dan saqtanýdyń neǵurlym «jeńil» túrin qoldanýda eken. Iаǵnı, saýalnamaǵa qatysqan árbir adam «únemi qolyn jýady nemese antıseptıkterdi paıdalanady eken» (95,9%). Az, dese de kópshiligi qoǵamdyq oryndarda maska kıedi (82,8%)»,- dep jazdy qala ákimi Facebook-tegi paraqshasynda.

«Bul rette meni, qalanyń ákimi retinde jastardyń beıqamdyǵy alańdatady. 25-ten 40 jasqa deıingi árbir besinshi jas qala turǵyny nemese respondentterdiń 25%-y juqtyrý qaýpin sezinbeıdi nemese moıyndamaıdy.

Sondyqtan jastarǵa jáne orta jastaǵy qala turǵyndaryna aıtarym, jınalyńdar! Sanıtarlyq ereje barlyǵyna mindetti. Bul beıqamdyq bizdi orǵa jyǵady. Jaqyndaryńyz ben qalanyń qaýipsizdigine qaýip tóndirmeńizder.

Memleket basshysy Q. K. Toqaevtyń aıtýynsha, indet — soǵystyń bir túri. Bul qaýipti indet beıqamdyqty keshirmeıdi. Biz birlessek qana bul dertti jeńe alamyz. Bizdiń basty qarýymyz — temirdeı tártip. Indetke qarsy kúreste yntymaǵymyz úzilmesin», dep túıindedi Baqytjan Saǵyntaev.