11 Shilde, 2020 NEWS

Toqaevtyń nazaryna: Qazaqstandaǵy pnevmonııa koronavırýs dep tanylsyn!

Qamshy portaly Dúnıejúzilik densaýlyq saqtaý uıymynyń (DDSU), Qazaqstan jáne shetel ǵalymdarynyń málimdemelerin negizge alyp, prezıdent Qasym-Jomart Toqaev pen densaýlyq saqtaý mınıstri Alekseı Soıdy Qazaqstandaǵy pnevmonııany koronovırýs dep tanýǵa shaqyrady.

Kórneki sýret

Qazaqstannyń densaýlyq saqtaý mınıstrligi ókpesi qabynyp aýyryp jatqan naýqastardy koronavırýs emes, pnevmonııa deýden tanbaı otyr. Alaıda Dúnıejúzilik densaýlyq saqtaý uıymy, Qazaqstan jáne shetel ǵalymdary elde jappaı taralyp jatqan pnevmonııa dertiniń is júzinde koronavırýs ekenin málimdedi.

Qazaqstanda sońǵy resmı derekke saı, 56 455 adamnan COVID-19 anyqtalǵan. Onyń ishinde 32 500 naýqas aýrýdan aıyǵyp shyqsa, 264 adam indetten kóz jumǵan. Bul koronavırýs pandemııasy endi bastalǵan shaqta densaýlyq saqtaý mınıstrligi boljaǵan mejeden 16 esege kóp.

Al elde pnevmonııadan kóz jumǵandardyń sany jarııalanbady. Densaýlyq saqtaý mınıstri "naqty derekti habarlaımyz" degenimen, aqparat áli shyqqan joq. Tek jyl basynan beri 6 aıda atalǵan syrqattan mert bolǵandar statıstıkasy aıtyldy. Alaıda onyń ózi ala-qula. Máselen, 3 shildede Qazaqstannyń bas sanıtar dárigeri Aıjan Esmaǵambetova elde sońǵy jarty jylda pnevmonııadan 1 772 adam ajal qushqanyn málimdegen. Al densaýlyq saqtaý mınıstr Alekseı Soı 9 shildede ótken brıfıngte sońǵy alty aıda 1 172 adamnyń pnevmonııadan qaıtys bolǵanyn aıtqan.

Bas sanıtar Aıjan Esmaǵambetovanyń dereginshe, pnevmonııadan kóz jumǵandar COVID-19-dan qaza tapqandardan 7 esege, mınıstr málimeti boıynsha pnevmonııadan qaıtys bolǵandar koronavırýs óliminen 5 esege artyq.

Bul málimdemelerden keıin, resmı derekti negizge alyp aldymen Qytaı, artynsha batystyń on shaqty iri baspasóz quraly Qazaqstanda ólim kórsetkishi koronavırýstan da joǵary ókpe aýrýy ıaǵnı pnevmonııa tarap jatqany týraly jazdy.

Keıin ulybrıtanııalyq Daily Mail basylymy aǵylshyn jáne qytaı medısına mamandarynan suhbat alyp, mamandarynyń "Qazaqstanda taralyp jatqan pnevmonııa is júzinde COVID-19" degen qorytyndysyn jarııalaǵan.

Al dúnıejúzilik densaýlyq saqtaý uıymy juma kúni Qazaqstandaǵy ókpe aýrýyn COVID-19 dep sanaıtynyn málimdedi.

DDSU tótenshe jaǵdaı baǵdarlamasynyń jetekshisi Maık Raıannyń sózinshe, Qazaqstandaǵy COVID-19 qozǵalysynyń joǵary traektorııasy pnevmonııanyń shyn máninde COVID-19-dyń anyqtalmaǵan jaǵdaılary ekenin bildiredi.

Buǵan deıin qazaqstandyq neırohırýrg dáriger Myńjylqy Berdiqojaev "pnevmonııadan qaıtys bolyp jatqan adamdardyń 99 paıyzynyń ólimine koronavırýs sebep" ekenin málim etken.

Qamshy portaly osy rette Dúnıejúzilik densaýlyq saqtaý uıymynyń, Qazaqstan jáne shetel ǵalymdarynyń málimdemelerin negizge alyp, prezıdent Qasym-Jomart Toqaev pen densaýlyq saqtaý mınıstri Alekseı Soıdy Qazaqstandaǵy pnevmonııany koronavırýs dep tanýǵa shaqyrady.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir