Elordada «Baqytty Shańyraq» múgedek balalardy tárbıelep otyrǵan analardy qoldaý ortalyǵy ashyldy

Ortalyqta múmkindigi shekteýli balalary bar analar tigin atelesi, massaj, manıkıýr kabınetterinde, shashtaraz, polıgrafııada jumys isteıtin bolady, dep habarlaıdy elorda ákimdiginiń resmı saıty.

Analar bıyl mamyrda «Baqytty shańyraq» qoryn ashty. Osyndaı biregeı ortalyqty qurý týraly bastamany ákimdik pen mesenattar qoldady. Olarǵa arnaıy oryn bólinip, qajetti jabdyqtar berildi.

«Analar uzaq ýaqyt boıy jumys istep, óz múmkindikterin tolyq ashýdy armandady. Ortalyqta sheberlik synyptary ótetin bolady. Meniń barlyq analar óz-ózine degen senimin joǵaltpaı, rýhy bıik bolsa degen tilegim bar», – deıdi «Baqytty shańyraq» QQ tóraıymy Pernesh Ábdikárimova.

Ortalyqtyń ashylý saltanatyna Nur-Sultan qalasy ákiminiń orynbasary Baqtııar Máken qatysty.

«О́tken jyldan bastap biz analar ıdeıasyn qalaı júzege asyrýǵa bolatynyn oıladyq. Bizdi mesenattar qoldaǵany qýantty. Ortalyqta 13 túrli qyzmet kórsetiletin bolady. Jalpy qalada erekshe bala tárbıelep otyrǵan bes myńǵa jýyq ana bar. Olardyń árqaısysynyń óz qabileti bar. Qalada osyndaı ortalyqtar kóp bolady. Josparlar óte kóp. Árıne, bastamany ata-analar bastaý kerek. Al olardy júzege asyrý qala basshylyǵy men mesenattardyń qolynda. Memleket tarapynan múmkindigi shekteýli balalardy baǵyp otyrǵan otbasylarǵa qoldaý kórsetilip keledi. Ákimdik bul rette júıeli jumys isteýde. Ońaltý ortalyqtary, ınvataksıler kóbeıip, jumysqa ornalastyrý máseleleri sheshilýde», – dep atap ótti Baqtııar Máken.

Regına Botsman eki bala tárbıelep otyr. Eki balanyń anasy mundaı múmkindiktiń bolǵanyna óte qýanyshty.

«Men vızajıst sheber bolyp jumys isteımin. Sankt-Peterbýrgte oqydym. Bolashaqta bul maǵan odan ári ósý úshin paıdaly dep oılaımyn. Bizde balalarǵa ýaqyt bólý úshin jumys kestesi erkin tártipte jasalǵan. Bizdiń árqaısymyz óz maqsattarymyzǵa qol jetkizgimiz keledi, biraq balalarymyzdyń dıagnozyna baılanysty biz úıde otyrýǵa májbúrmiz. Al qazir bizdiń armandarymyz júzege asty. Ortalyqtyń ashylýyna janymyzdy saldyq», – deıdi R.Botsman