"Kúıeýimmen qoshtasyp ta úlgermedim" Blokbekette qaıtys bolǵan polıseıdiń áıeli málimdeme jasady (vıdeo)

Almaty oblysyndaǵy blokbekette jantúrshigerlik apat jasap, qos polıseıdiń ólimine sebep bolǵan kúdiktiniń anasy baýyr eti – balasynyń qasaqana adam óltirmegenine senimdi. Bul týraly KTK telearnasy habarlady.

– Senbeımin, senbeımin. Qasaqana adam óltirdi degenge men senbeımin. Eshkim de oılamaıdy ǵoı. Men óz balamdy sondaıǵa barady dep aıtpaımyn ǵoı, durys pa? Ol ishpeıdi de, temeki de tartpaıtyn, – dedi kúdiktiniń anasy Klara.

Aıta keteıik, qalalyq polısııa departamentindegiler kúdiktiniń sol sátte mas bolǵanyn málimdegen. Al, blokbekette qaıtys bolǵan Dastan Abdyqanovtyń anasy men áıeli oqıǵanyń aq-qarasyn anyqtap, kináliniń ádil jazalanýyn suraıdy.

Serjanttyń áıeli: «kúıeýimmen qoshtasyp ta úlgermedim» dep, kózine jas aldy. О́ıtkeni ol túngi aýysymǵa ketetin kúni jaqyndaryna aıttap júripti. Jalpy karantın bastalǵaly Dastannyń jumysy kóbeıgen. Dese de, blokbekettegi kezekshilikke sanaýly ret túsipti.

Qaıǵydan qan jutqan onyń anasy istiń aq-qarasyn anyqtaýdy Prezıdentten surady.

– Úsh adamnyń otbasyn oırandap ketip otyr. Úsh otbasynda qansha balanyń bolashaǵy qaldy, qansha jar eńirep qaldy, qansha ana, qansha áke qan jutyp qaldy. Onyń ózi osy úsh otbasynyń basyna kelgen úlken qaıǵy-qasiret. Ol adam jer basyp júrer, ómir súrer, tamaq isher, uıyqtar, biraq men oılaımyn, túptiń-túbinde Alla jazasyn beredi, – dedi marqumnyń anasy Janatgúl Ábirova.

Aıta keteıik, marqum Dastan Ábdiqanovtyń endi ǵana qyrqynan shyqqan uly bar. Qaza tapqan ekinshi polıseı Jaras Janǵazıevtiń artynda qos qyzy men júkti áıeli qaldy. Al bir ajaldan aman qalǵan úshinshi tártip saqshysy dúısenbide jan saqtaý bóliminen palataǵa shyǵarylǵan. 

Eske sala keteıik, 25 mamyr kúni tańǵa jýyq № 4 blokbekette BMW júrgizýshisi mas kúıinde beton qorshaýǵa soǵylyp baryp, ınersııamen patrýldik polısııa kóligin soqqan. Jol-kólik oqıǵasynan eki polısııa qyzmetkeri kóz jumǵan bolatyn.