Janbolat Mamaı: Bılik "ujymdyq Qosanovty" daıyndap jatyr

Prezıdent Toqaev "Saıası partııalar týraly" zańǵa qol qoıǵannan keıin elde parlament saılaýynyń dúbiri jaqyndap keledi degen aýandaǵy áńgime jıileı bastady.

Alaıda Qamshy tilshisine pikir bildirgen qoǵam belsendisi, Demokratııalyq partııa qurý boıynsha bastamashyl top jetekshisi Janbolat Mamaı "parlament saılaýy merziminde ótedi, munyń ózindik astary bar" dep esepteıdi.

– Elde elektoraldyq sıklǵa daıyndyq bastaldy. Biraq menińshe bılik parlament saılaýyn bıyl ótkizbeıdi. Olar aldymen kúzde me eken máslıhat saılaýyn ótkizedi. Odan keıin baryp, parlament saılaýyn óz merzimine belgilep otyr. Qazirgi parlamenttiń quzireti 2021 jylǵy naýryzda bitedi. Zań boıynsha keminde eki aı buryn parlament saılaýy ótýi kerek. Bul – qańtar aıy. Osylaısha, bılik jańa jyldan keıin, sýyq kezde, kóp jerlerde jol qatynastary jabylǵan shaqta parlament saılaýyn ótkizýdi josparlap otyr dep oılaımyn. Oǵan deıin qarasha aıynda parlamentti taratyp, bir aı ýaqytty partııalardy tirkeýge jumsap, úgit-nasıhat jumysyna bir aı qaldyrmaq, – deıdi ol.

Janbolat Mamaı Dempartııa qurý boıynsha bastamashyl top ókilderi búginde belsendi jumys jasap jatqanyn aıtty.

– 6 maýsym kúni "nesıelik amnıstııany", "jer sheteldikterge satylmaýy kerek, jalǵa berilmeýi kerek" degendi talap etip jalpyulttyq, jalpyrespýblıkalyq deńgeıdegi mıtıng ótkizýdi josparlap otyrmyz. Sol sharadan keıin bastamashyl top qurý, ony tirketý, quryltaı sezd uıymdastyrý sekildi jumystardy mindetti túrde qolǵa alamyz, –  degen qoǵam belsendisi bılik jańa saıası partııalardy qurýǵa qulyqty emes, tek qoǵamdyq qoldaý arqyly bılikti partııalardy tirkeýge májbúrleýge bolatynyn atap ótti.

Qoǵam belsendisiniń pikirinshe, "bılik qoǵamdy aldaý úshin "ujymdyq Qosanovty – jalpyulttyq sosıal-demokratııalyq partııasyn daıyndap jatyr".

– Belgili bir toptar dóńgelek ústel uıymdastyramyz, koalısııa quramyz degen máselelerdi kóterip júr. Ol áńgimeniń barlyǵy JSDP tóńiregindegi áńgimeler. Menińshe, bul bılikpen kelisilgen ssenarıı. Aldaǵy saılaýda "Qazaqstanda oppozısııalyq partııalar saılaýǵa túsip jatyr" dep kórsetý arqyly JSDP-ny halyqty taǵy da aldaý úshin paıdalaný oıyny júrgeli jatyr, – deıdi ol.